27,192 total reads
Iginiit ni Pope Leo XIV na dapat manaig ang kapakanan ng mamamayan ng Venezuela sa gitna ng patuloy na krisis na kinakaharap ng bansa.
Ito ang mensahe ng santo papa sa pagsiklab ng kaguluhan sa lugar kasabay ng panawagang wakasan ang karahasan at itaguyod ang katarungan, kapayapaan, at paggalang sa karapatang pantao.
“The good of the beloved Venezuelan people must prevail over every other consideration. This must lead to the overcoming of violence, and to the pursuit of paths of justice and peace,” ayon sa pahayag ni Pope Leo XIV.
Batay sa ilang ulat, sumiklab ang kaguluhan sa Venezuela noong January 3 kasunod ng mga alegasyon ng Amerika laban kay Venezuela President Nicolás Maduro, na iniuugnay sa pamumuno sa isang “narco-terrorist” network, mga paratang na mariing itinanggi ng pamahalaan ng Venezuela.
Sinabi ni Pope Leo na nawa’y mawakasan ang karahasang nangyayari sa Venezuela at piliing hanapin ang landas ng katarungan at kapayapaan na nakaugat sa paggalang sa soberanya ng bansa at sa umiiral na batas at Konstitusyon sa lugar.
“Guaranteeing the sovereignty of the country, ensuring the rule of law enshrined in its Constitution, [and] respecting the human and civil rights of each and every person,” ayon pa sa santo papa.
Dalangin ni Pope Leo ang katiwasayan sa bansa at manumbalik ang pagbubuklod tungo sa kapayapaan at pag-unlad lalo na sa mga dukha na lubhang naapektuhan sa kasalukuyang kaguluhan sa lugar. Ipinagkatiwala ng santo papa sa pamamatnubay ng Our
Lady of Coromotoat mga panalangin nina Saints José Gregorio Hernández at Carmen Rendiles ang kalagayan ng Venezuela.
Samantala, napaabot din ni Pope Leo XIV ang kanyang pakikiramay at panalangin sa mga biktima ng trahedya sa Crans-Montana, Switzerland, na ikinasawi ng 40 katao na karamihan ay mga kabataan.
“I assure them of my prayers for the young people who died, for the injured, and for their families,” ayon sa santo papa.
Muling nanawagan ang Santo Papa sa buong mundo na patuloy na manalangin at magpakita ng pakikiisa sa mga mamamayang dumaranas ng digmaan, karahasan, at iba’t ibang anyo ng pagdurusa, bilang patunay ng pananampalataya sa Diyos ng kapayapaan.
