267 total views
Binigyang-diin ni Manila Archbishop Cardinal Jose Advincula na nagiging ganap ang kahulugan ng edukasyon kung ito ay iniuukol sa paglilingkod sa kapwa.
Ito ang mensahe ng kardinal sa isinagawang Thanksgiving Mass ng RCAM ES Cluster 6 sa Manila Cathedral bilang pasasalamat sa pagtatapos ng School Year 2025–2026.
Sa kanyang homiliya, ibinahagi ng arsobispo ang “tatlong P” na dapat baunin ng mga mag-aaral, ang Power of Learning, Presence of Jesus, at Purpose of Serving.
Iginiit ng kardinal sa mga mag-aaral na gamitin ang kanilang natutuhan hindi lamang para sa sarili kundi para sa kapakinabangan ng kapwa.
“Your education becomes meaningful when it is used to serve others… Education is not only about becoming intelligent. It is about becoming a person who gives life to others,” ayon kay Cardinal Advincula.
Sa unang punto, iginiit ni Cardinal Advincula na ang bawat aral ay may ambag sa paghubog ng pagkatao.
“Each lesson may seem small, like a drop of water. But drop by drop, it becomes a river that shapes who you are,” ayon sa arsobispo.
Dagdag pa ng kardinal, ang pag-aaral ay hindi lamang paghahanda sa pagsusulit kundi pagbubukas sa karunungan ng Diyos.
“When you study well, you are allowing God’s wisdom to flow into your life so that one day you may bring life, hope, and goodness to others,” paliwanag ng arsobispo.
Sa ikalawang punto, binigyang-diin ni Cardinal Advincula ang kahalagahan ng presensya ni Hesus sa buhay ng mga mag-aaral.
Hinimok din ng arsobispo ang mga kabataan na huwag panghinaan ng loob sa gitna ng mga pagsubok.
“Education becomes complete only when Jesus is present in our lives… Sometimes we may feel tired, discouraged, or unsure of ourselves… we can hear Jesus saying to us, ‘Rise,” ani ng kardinal.
Samantala, sa ikatlong punto ay hinikayat ng arsobispo ang mga mag-aaral na ihandog ang kanilang kaalaman sa kapwa.
“The knowledge and skills you receive are not meant to stay only with you—they are meant to flow outward,” ayon kay Cardinal Advincula.
Iginiit ng kardinal na ang edukasyon ay nagkakaroon ng tunay na kabuluhan kapag ito ay nagiging instrumento ng paglilingkod at pagmamalasakit sa kapwa at sa lipunan.
Pinaalalahanan ni Cardinal Advincula ang mga mag-aaral na dalhin ang mga natutuhan hindi lamang bilang kaalaman kundi bilang paninindigan sa buhay.
“Your education will not only make you knowledgeable—it will make you faithful, compassionate, and ready to serve,” ani ng kardinal.
Ang RCAM ES Cluster 6 ay pinamumunuan ni Fr. Nolan Que kung saan kabilang dito ang Holy Child Catholic School, Manila Cathedral School, at ang San Rafael Parochial School.
