484 total views
Inaanyayahan ng Divine Mercy Apostolate ng Dicoese of Tandag ang mga mananampalataya na makibahagi sa ikatlong Diocesan Apostolic Congress on Mercy (DACOM) na gaganapin sa May 18 hanggang 19, 2026.
Alinsunod sa temang “Handum-Laum sa Kalooy sa Ginoo,” layunin ng pagtitipon na pag-alabin ang debosyon sa Banal na Awa ng Diyos at dalhin ang mga kalahok sa isang mas malalim na karanasan ng Kanyang pag-ibig at habag.
Hango sa pandaigdigang misyon ng World Apostolic Congress on Mercy (WACOM), itinuturing ang DACOM bilang mahalagang pagtitipon ng simbahan sa lokal na antas upang palaganapin ang mensahe ng Divine Mercy.
Tampok sa dalawang araw na programa ang banal na misa, Eucharistic adoration, mga makabuluhang talakayan, at mga patotoo ng pananampalataya na inaasahang magbibigay-inspirasyon at magpapatibay sa espiritwal na buhay ng mga dadalo.
Pangunahing magbibigay ng panayam sa pagtitipon sina Tandag Bishop Raul Dael; Exorcist Fr. Darwin Gitgano; at Sr. Pamela May Lonoy, MSM, na maghahatid ng mga pagninilay ukol sa awa ng Diyos at sa panawagang isabuhay ito sa pang-araw-araw.
Bukas ang pagtitipon sa lahat, kabataan, pamilya, at mga layko na nagnanais na maranasan ang pagbabagong dulot ng awa ng Diyos at maging instrumento ng habag sa lipunan.
Sa diwa ng paanyaya, hinihikayat ang mga mananampalataya na makiisa sa DACOM 2026 at tugunan ang panawagang maging maawain tulad ng Ama, bilang paghahanda sa mas aktibong pakikibahagi sa misyon ng simbahan.
