7,842 total reads
Ibinahagi ni Antipolo Bishop Ruperto Santos ang pahintulot ng Apostolic Penitentiary ng Vatican sa pagkakaloob ng plenary indulgence sa mga deboto at peregrinong dadalaw sa International Shrine of Our Lady of Peace and Good Voyage o Antipolo Cathedral.
Ayon sa obispo, ang natatanging biyayang espirituwal ay kaugnay ng pagdiriwang sa karangalan ng Mahal na Birhen ng Antipolo sa pagdiriwang ng ika-400 taon ng pagdating ng imahe sa Pilipinas at ika-100 anibersaryo ng canonical coronation.
“By virtue of the petition of the Bishop of Antipolo, the Most Reverend Ruperto Cruz Santos, the Holy Father, His Holiness Pope Leo XIV, through the Apostolic Penitentiary, has graciously granted the gift of a Plenary Indulgence to the faithful who devoutly participate in the solemn celebrations in honor of Our Lady of Peace and Good Voyage,” ayon sa isinasaad sa decree.”
Ayon sa kautusan, maaaring makamit ang plenary indulgence na nagpapatawad sa lahat ng temporal na kaparusahan ng kasalanan ng mga debotong magsasagawa ng pilgrimage sa Antipolo Cathedral at taimtim na makikibahagi sa mga banal na gawain, kabilang ang panalangin, pagninilay, at iba pang gawaing debosyon.
Saklaw sa bisa ng indulhensya ang mga sabado mula noong December 6, 2025 hanggang November 28, 2026 kasabay ng inaasahang pagdating ng milyong-milyong deboto na makikiisa sa mahalagang pagdiriwang ng debosyon sa Birhen ng Antipolo.
Sinabi ni Bishop Santos na upang matanggap ng mga peregrino at deboto ang plenary indulgence ay nararapat pa ring sundin ang mga itinakdang alituntunin ng simbahan sa pagtanggap, kabilang ang pagkumpisal, pagtanggap ng Banal na Komunyon, at panalangin para sa intensyon ng Santo Papa.
Isinaad din sa kalatas na ang mga matatanda, maysakit at may kapansanang walang kakayahang dumalaw nang pisikal sa pandaigdigang dambana ay maaari pa ring magtamo ng biyaya ng indulhensya kung makikiisa sa espiritwal na mga pagdiriwang at mag-aalay ng kanilang panalangin at paghihirap sa Diyos.
Hinimok ni Bishop Santos ang mga pari na maging bukas sa paggawad sa sakramento ng kumpisal sa mga deboto at peregrino upang tamasahin ang plenary indulgence ng simbahan.
Dalangin ni Bishop Santos na gamiting pagkakataon ng mananampalataya ang natatanging pagdiriwang ng international shrine sa buong taon ng 2026 na sa tulong ng debosyon ng Mahal na Birhen ng Antipolo ay higit na mapalapit ang bawat isa kay Hesus sa pamamagitan ng pamimuntuho sa Mahal na Ina.
