615 total views
Patuloy ang paghahatid ng tulong ng Social Action Center ng Diocese of Legazpi sa mga residenteng naapektuhan ng pagliligalig ng Bulkang Mayon, habang isinailalim naman sa state of calamity ang walong lungsod at bayan sa Albay.
Nagsagawa ang SAC-Legazpi ng community relief operation sa Tagaytay Elementary School na kasalukuyang nagsisilbing evacuation center para sa mga pamilya mula sa Barangay Anoling sa Camalig.
Ayon sa social action arm ng diyosesis, umabot sa 124 pamilya o 435 indibidwal ang nabigyan ng pagkain, face masks, inuming tubig, at hygiene kits sa isinagawang relief mission.
Nagpasalamat din ang simbahan sa mga donor, volunteers, parish workers, barangay health workers, at iba pang katuwang na agad na tumugon sa panawagan para sa mga nagsilikas.
“As Mayon continues to affect communities in Albay, we remain committed to reaching more families in need,” ayon sa SAC Legazpi.
Hinikayat naman ng SAC Legazpi ang publiko na patuloy na makiisa sa pagtulong sa mga apektadong pamilya sa pamamagitan ng cash donations sa GCash account ni Legazpi SAC Director, Fr. Eric Martilliano sa 0995-749-6571, o sa BPI account na Social Action Center-SPM, sa account number na 0851-0067-37.
Maaari ring maghatid ng in-kind donations sa tanggapan ng SAC-Legazpi sa Cathedral Compound sa Legazpi City.
Samantala, sa bisa ng Provincial Resolution, isinailalim sa state of calamity ang mga lungsod ng Legazpi, Tabaco, at Ligao, gayundin ang mga bayan ng Santo Domingo, Malilipot, Daraga, Guinobatan, at Camalig upang mapabilis ang disaster response at rehabilitation efforts.
Sa ilalim ng deklarasyon, maaari nang gamitin ng mga apektadong local government units ang kanilang Quick Response Fund at magpatupad ng price control measures at iba pang kinakailangang hakbang para sa mga apektadadong komunidad.
