2,350 total reads
Nanawagan si Caritas Philippines President, San Carlos Bishop Gerardo Alminaza ng mas mabilis at makatarungang paglipat ng bansa mula sa fossil fuel tungo sa renewable energy upang matugunan ang lumalalang krisis sa enerhiya at epekto ng climate change.
Ito ang binigyang-diin ng obispo sa kanyang mensahe sa National People’s Convention on the Energy Crisis and the Energy Transition, ang ikaapat na pambansang pagtitipon ng Power for People Coalition, noong Hunyo 3.
Ayon kay Bishop Alminaza, hindi lamang usaping teknikal o pang-ekonomiya ang enerhiya kundi isang usaping moral na direktang nakaaapekto sa buhay at dignidad ng mamamayan.
“They remind us that energy is not merely a technical issue. It is not simply a matter for experts, corporations, regulators, or policymakers. Energy is about people. For us, this is where the conversation begins. The energy crisis is not only an economic issue. It is a moral issue,” pahayag ni Bishop Alminaza.
Sinabi ng obispo na patuloy na nahaharap ang mga Pilipino sa mataas na singil sa kuryente, tumataas na gastusin sa transportasyon, at mga pagkasira ng kabuhayan dulot ng krisis sa klima habang nananatiling nakadepende ang bansa sa coal, langis, at natural gas.
Binigyang-diin din nito na ang kasalukuyang tensyon sa pagitan ng Estados Unidos, Israel, at Iran ay muling nagpakita ng panganib ng labis na pag-asa sa inaangkat na fossil fuels.
“The current crisis is a reminder that genuine energy security cannot be built on dependence. As long as we remain dependent on imported fossil fuels, our economy and our people remain vulnerable to events beyond our control,” ayon kay Bishop Alminza
Dahil dito, nanawagan ang obispo ng pagwawakas hindi lamang sa paggamit ng coal kundi sa kabuuang pagdepende sa fossil fuel at pagpapabilis ng paglipat sa malinis, abot-kaya, maaasahan, at madaling maabot na renewable energy.
Kasabay nito, iginiit ng obispo na hindi malulutas ng teknolohiya lamang ang suliranin sa enerhiya dahil nagmumula rin ito sa mga suliranin sa pamamahala, kakulangan sa pananagutan, at kawalan ng transparency.
“Transparency is not optional. Public participation is not optional. Good governance is not optional. Without them, no energy transition can truly be just. We cannot ignore the tolerated evils that continue to weaken our institutions and undermine the common good,” giit ni Bishop Alminaza.
Iginiit din ni Bishop Alminaza na hindi maaaring pag-usapan ang renewable energy nang hindi tinutugunan ang korapsyon, pananagutan ng mga korporasyon, at karapatan ng mga komunidad na maaapektuhan ng mga proyekto.
Umaasa naman ang obispo na magsisilbing pagkakataon ang convention upang mapalakas ang pagkakaisa ng iba’t ibang sektor sa pagsusulong ng pananagutan, mabuting pamamahala, at ecological justice para sa kapakanan ng kasalukuyan at susunod na henerasyon.
“A future powered not by fossil fuels but by clean and renewable energy, where communities have a voice in decisions that affect them, where public institutions serve the common good, where economic progress does not come at the expense of people or the planet, where no one is left behind,” saad ni Bishop Alminaza.
