7,342 total reads
Hinihikayat ng Conference of Major Superiors in the Philippines (CMSP) ang lahat na magkaisa sa pagpapaabot ng tulong para sa mga pamilyang naapektuhan ng 7.8-magnitude na lindol sa Mindanao.
Sa inilunsad na “CMSP CARES: Call for Donations for the Victims of the Mindanao Earthquake,” hinikayat ng organisasyon ang publiko na makiisa sa pagtulong sa mga biktima ng kalamidad na kasalukuyang nahaharap sa pagsubok, kawalan ng katiyakan at kakulangan sa mga pangunahing pangangailangan.
Ayon sa CMSP, ito ang panahon para magbuklod bilang isang komunidad ng pananampalataya at malasakit upang maipadama ang pagmamahal at awa ng Diyos sa mga nasalanta ng sakuna.
” In this time of tragedy and uncertainty, let us come together as one community of faith and compassion. The recent earthquake in Mindanao has left many families grieving, displaced, and in urgent need of assistance. “ Bahagi ng pahayag ng CMSP.
Binigyang-diin ng samahan na sa pamamagitan ng mga donasyon ay makatutulong ang Simbahan na makapaghatid ng pagkain, malinis na tubig, pansamantalang matutuluyan, gamot, at iba pang pangunahing pangangailangan ng mga naapektuhang pamilya.
“As consecrated persons and people of goodwill, we are called to be instruments of God’s love and mercy. Through your generous donations, we can help provide food, water, shelter, medicines, and other essential needs for our brothers and sisters affected by this disaster. “ Ayon pa sa CMSP.
Paliwanag ng organisasyon mahalaga ang pakikibahagi ng lahat sa pagtugon sa pangangailangan ng mga biktima ng lindol.
Iginiit din ng CMSP na anumang halaga o uri ng tulong ay malaking ambag upang makapagbigay ng pag-asa at agarang ayuda sa mga pamilyang apektado ng sakuna.
Bukod dito, patuloy ding hinihikayat ng CMSP ang mga mananampalataya na samahan ng panalangin at konkretong pagkilos ang mga pagsisikap na makatulong sa pagbangon ng mga komunidad na sinalanta ng lindol sa Mindanao.
