422 total views
Nanawagan ng agarang tulong ang Diocese of Marbel kasabay ng lumalalang kakulangan sa tubig at pagkain sa ilang bahagi ng Sarangani at General Santos City kasunod ng magnitude 7.8 na lindol na tumama sa Mindanao noong Hunyo 8.
Batay sa huling ulat ng National Disaster Risk Reduction and Management Council (NDRRMC), umabot na sa 37 ang nasawi sa lindol, kabilang ang 33 sa Soccsksargen at apat sa Davao Region, habang mahigit 479 ang nasugatan at apat na indibidwal ang nawawala at patuloy na pinaghahanap.
Ayon kay Marbel Diocesan Social Action Director Fr. Jerome Millan, patuloy na nararanasan ng libu-libong residente ang kawalan ng suplay ng kuryente na nagdudulot ng seryosong epekto sa pagkuha ng tubig at iba pang pangunahing pangangailangan.
Sinabi ng pari na bukod sa kakulangan sa tubig, maraming manggagawa ang nawalan din ng pagkakakitaan dahil nananatiling sarado ang mga establisimyento na nagtamo ng pinsala sa lindol.
“Iyong mga taong arawan, dahil walang pasok at sarado ang maraming establishment, wala silang pambili ng pagkain nila. Basic talaga dito ngayon ‘yung tubig at pagkain,” pahayag ni Fr. Millan.
Ikinababahala rin ng diyosesis ang sitwasyon sa bayan ng Glan sa Sarangani na pansamantalang nahiwalay sa ibang lugar matapos masira ang isang tulay at magkaroon ng mga pagguho ng lupa dulot ng lindol.
Dagdag pa ni Fr. Millan, marami rin sa mga residente ng Glan ang wala pa ring suplay ng kuryente at nahaharap sa kakulangan ng malinis na tubig habang limitado ang pagpasok ng mga pangunahing pangangailangan sa lugar.
Iniulat din ng pari na maraming bahay, kapilya, at ilang pasilidad ng simbahan ang nagtamo ng pinsala, kabilang ang isang simbahan sa General Santos City na bumagsak ang kisame.
“Maraming mga structures din ng church na may mga crack. Pero wala namang nag-collapse talaga na mga simbahan. Maraming chapels ang nasira talaga na hindi na magamit kasi dahil maliliit lang, hindi siya ganoon katibay,” ayon kay Fr. Millan.
Samantala, sinabi rin ni Fr. Millan na pinili ng maraming residente na manatili sa open spaces at sa gilid ng mga kalsada sa halip na bumalik sa kanilang mga bahay dahil sa pangamba sa mga aftershock.
“So far, walang nabuong evacuation center. Karamihan sa mga tao sa labas natutulog dahil hindi sila panatag na bumalik sa loob ng bahay,” saad ni Fr. Millan.
Dahil dito, nanawagan ang Diocese of Marbel ng agarang suporta para sa mga apektadong komunidad, lalo na para sa malinis na tubig, pagkain, at iba pang pangunahing pangangailangan habang nagpapatuloy ang pangangalap ng datos at assessment sa lawak ng pinsalang dulot ng lindol.
“Kung maaari po ay may tulong sa immediate na pangangailangan ng kinasasakupan ng Diocese of Marbel. Later on lalabas din ang pangangailangan kung paano maibabalik at maaayos ang mga bahay na nasira ng ating mga kababayan, lalo na ang mga mahihirap,” panawagan ni Fr. Millan.
