347 total views
Nagsagawa ng emergency response at situational assessment ang apat na diyosesis sa Mindanao sa mga lugar na naapektuhan ng malakas na lindol sa Diocese of Digos upang matukoy ang agarang pangangailangan ng mga residente at mapalakas ang paghahatid ng tulong.
Ayon sa ulat, nagtungo sa bayan ng Jose Abad Santos sa Davao Occidental ang DADITAMA Social Action Network, na binubuo ng Archdiocese of Davao at mga Diyosesis ng Digos, Tagum at Mati, kasama ang Diocese of Tagum SAFER (Social Action Force Emergency Responders), upang suportahan ang mga operasyon sa dalawang apektadong parokya sa Barangay Caburan at Barangay Nuing.
Layunin ng misyon na magsagawa ng masusing pagtatasa sa kalagayan ng mga komunidad na naapektuhan ng kalamidad at tiyakin ang maayos na koordinasyon ng mga humanitarian program ng Simbahan.
“This mission manifests the Church’s solidarity and commitment to accompany communities affected by disaster. We ask for your prayers for the affected families and for the safety of all responders serving on the ground,” ayon sa DADITAMA.
Samantala, patuloy naman ang paghahanda ng Social Action Ministry ng Diocese of Tagum ng mga food pack para sa mga pamilyang naapektuhan sa Balut Island.
Sa pamamagitan ng serye ng mga pagpupulong at koordinasyon sa mga katuwang na ahensya, inaasahang maipapadala ang mga relief goods sa tulong ng Philippine Coast Guard, na katuwang ng Simbahan sa pagtulong sa mga biktima ng lindol.
Nanawagan naman ang Social Action Ministry sa publiko na makibahagi sa relief drive sa pamamagitan ng pagdodonate ng mga pangunahing pangangailangan tulad ng bigas, de-lata, instant noodles, asukal, asin, kape, toyo at suka.
Maaaring dalhin ang mga donasyon sa SAM Centre sa Sagrado Corazon de Jesus Nazareno Parish sa Bermudez Compound, Apokon, Tagum City.
Batay sa pinakahuling ulat ng National Disaster Risk Reduction and Management Council (NDRRMC), umabot sa 337,000 pamilya o mahigit 1.3 milyong indibidwal ang naapektuhan ng malakas na pagyanig.
Sa bilang, 68 ang nasawi, 1,339 ang nasugatan, at 33 ang iniulat na nawawala.
Patuloy naman ang babala ng Philippine Institute of Volcanology and Seismology (PHIVOLCS) sa posibilidad ng malalakas na aftershocks na maaaring magdulot ng karagdagang panganib sa mga apektadong lugar.
