20,548 total reads
Aktibong nakibahagi ang mga Obispo sa naganap na National Signing Day para sa isang tunay na Anti-Political Dynasty Law sa pamamagitan ng people’s initiative.
Nagpaabot ng pasasalamat ang Dapat Isa Lang (D1L) Movement sa lahat ng mga nakibahagi sa isinagawang National Signing Day noong Hunyo 12, 2026 kasabay ng Araw ng Kalayaan bilang suporta sa pagsusulong ng isang tunay na Anti-Political Dynasty Law.
Ayon sa D1L Movement, ang matagumpay na pagsisimula ng signature campaign ay patunay ng lumalawak na suporta ng mga mamamayan para sa repormang naglalayong wakasan ang pamamayani ng mga dinastiyang pampulitika at palawakin ang partisipasyon ng mga ordinaryong Pilipino sa pamahalaan.
Kabilang sa personal na nakibahagi sa naganap na National Signing Day sina Legazpi Bishop Joel Baylon at Imus Bishop Reynaldo Evangelista bilang suporta sa pagsusulong ng isang tunay na Anti-Political Dynasty Law sa pamamagitan ng people’s initiative.
Matatandaang una ng nagpahayag ng suporta si Bishop Baylon sa layunin ng Dapat Isa Lang Movement sa pamamagitan ng isang pastoral letter.
Samantala, lumagda rin si Bishop Evangelista sa naturang petisyon bilang pakikiisa sa lumalawak na panawagan para sa pagpapatibay ng batas na naglalayong pigilan ang pamamayani ng mga dinastiyang pampulitika at palawakin ang partisipasyon ng mga mamamayan sa pamamahala.
Nagpasalamat din ang Dapat Isa Lang Movement sa mga nagpahayag ng kahandaang magsagawa ng signature collection sa kani-kanilang mga komunidad, at binigyang-diin na ang sigla at suporta ng mga volunteers ang nagbibigay-lakas sa kilusan upang maabot ang mas maraming lugar.
Iginiit naman ng D1L Movement na magpapatuloy ang kampanya bilang bahagi ng kanilang hangarin na maisulong ang isang mas makatarungan, mas bukas, at mas tunay na demokratikong sistema ng pamamahala para sa bansa.
Patuloy namang hinihikayat ng Dapat Isa Lang Movement ang publiko na makiisa sa signature campaign bilang bahagi ng pagsusulong ng mga repormang nagtataguyod ng pananagutan, mabuting pamamahala, at mas malawak na representasyon sa sistemang pampulitika ng bansa.
