22,872 total reads
Ilulunsad ng Apostolic Vicariate of Puerto Princesa (AVPP) sa August 11 ang Katipunan Formation Program for Good Citizenship ng Catholic Bishops’ Conference of the Philippines (CBCP), bilang bahagi ng pagpapalalim ng pananagutan ng mga mamamayan sa lipunan sa diwa at gabay ng pananampalataya.
Gaganapin ang paglulunsad sa Seminario de San Jose kung saan inaasahang dadalo ang humigit-kumulang 250 kinatawan mula sa iba’t ibang parokya ng bikaryato.
Ayon kay Puerto Princesa Bishop Socrates Mesiona, MSP, layunin ng programa na mahubog ang mga mananampalataya upang maging higit na aktibo at responsable sa pakikilahok sa buhay panlipunan, habang nananatiling nakaugat sa mga pagpapahalagang Kristiyano.
“Our Christian convictions serve as a catalyst for us to contribute meaningfully to society, and the Katipunan module presents a valuable resource to facilitate this aspiration. Consequently, it is my earnest hope that a significant number of our community will discover it to be beneficial,” ayon kay Bishop Mesiona.
Ang Katipunan Formation Program ay inilunsad ng CBCP bilang isang faith formation initiative na naglalayong hubugin ang mga Pilipino bilang mabubuting mamamayan na ginagabayan ng pananampalataya, integridad, at malasakit sa kapakanan ng nakararami.
Nauna nang binigyang-diin ni CBCP President at Lipa Archbishop Gilbert Garcera na hindi isang kilusang pampulitika ang programa kundi isang proseso ng paghuhubog sa mga mamamayang makikilahok sa lipunan, ay nakabatay sa mga pagpapahalagang Kristiyano.
Pangungunahan nina Madeliene Ibe at mga kasamahan mula sa Kaya Natin! Movement ang formation session. Katuwang ng CBCP ang naturang non-profit organization sa pagpapatupad ng programa upang isulong ang mabuting pamamahala, etikal na pamumuno, at pananagutan sa lipunan.
Sa pamamagitan ng paglulunsad ng programa sa Puerto Princesa, makikiisa ang bikaryato sa mas malawak na inisyatiba ng CBCP na itaguyod ang kultura ng integridad, pananagutan, at paglilingkod sa hanay ng mga Pilipinong Katoliko sa pamamagitan ng paghubog ng mabuting pagkamamamayan na nakasandig sa pananampalataya.
Kasama ang ulat ni Katya Santos
