11,135 total reads
Sa pagpapatuloy ng pagdinig ng Senate Impeachment Court, tumestigo ang isang auditor ng Commission on Audit o COA na nagsabing si Vice President Sara Duterte lamang ang kanyang na-audit na Bise Presidente at kalihim ng Department of Education o DepEd na tumanggap ng confidential funds.
Sa kanyang testimonya, sinabi ni State Auditor Roderick Wamil na sa panahong nakatalaga siya sa Intelligence and Confidential Funds Audit Office (ICFAO) ng COA mula 2014 hanggang 2024, sina dating Vice Presidents Jejomar Binay at Leni Robredo ay walang confidential fund appropriation.
“Dahil po since nung nag-assume po ako nung 2014 sa ICFAU, wala pong naging appropriation for confidential funds si dating Vice President Binay at si dating Vice President Robredo. Tanging si Vice President Sara Duterte lang po yung nagkaroon ng appropriation for the confidential funds,” tugon ni Wamil sa pagtatanong ni Counsel for Prosecution Atty. Lorna Kapunan.
Ayon kay Wamil, tanging ang Office of the Vice President sa ilalim ni Duterte ang nakatanggap ng confidential funds sa panahong siya ang nagsasagawa ng audit.
Sinabi rin ng auditor na si Duterte rin ang nag-iisang kalihim ng DepEd na kanyang na-audit na may confidential funds, na wala rin sina dating Education Secretaries Armin Luistro at Leonor Briones.
Batay sa kanyang audit, sinuri ng COA ang ₱500 milyong confidential funds ng Office of the Vice President mula 4th quarter ng 2022 hanggang 3rd quarter ng 2023, gayundin ang ₱112.5 M confidential funds ng DepEd para sa unang tatlong quarter ng 2023.
Pamantayan sa paggamit, pag-audit ng confidential at intelligence funds
Binigyang-diin din ni Wamil na mahigpit na sinusunod ng COA ang mga patakaran sa paggamit, accounting, at pag-audit ng confidential funds dahil pera ito ng taumbayan at may panganib na magamit sa hindi tamang paraan.
Ipinaliwanag ng auditor ng COA sa pagdinig na ang lahat ng confidential funds ay dumaraan sa compliance post-audit, kung saan sinusuri kung kumpleto ang mga dokumento at kung ang paggasta ay naaayon sa umiiral na batas at mga alituntunin.
“We follow strict compliance since what is involved ay public funds, so dapat strict ’yung accounting and auditing rules to prevent ’yung misuse ng fund,” ayon kay Wamil.
Dagdag pa ng testigo, “Ine-evaluate po namin kung ’yung disbursements ay properly supported with complete documents as required by the applicable rules and regulations, and if ’yung disbursements po ay hindi illegal, hindi irregular or hindi improper.”
Ipinaliwanag ni Wamil na ginagamit ng COA bilang batayan ang Joint Circular No. 2015-01, na nagtatakda ng mahigpit na pamantayan sa paggamit at pag-audit ng confidential at intelligence funds.
Ayon pa sa kanya, maaari lamang gamitin ang confidential funds sa mga layuning may kaugnayan sa seguridad at kapayapaan, kabilang ang pangangalap ng impormasyon, confidential operations, at pagbibigay ng reward sa mga impormante na nakatutugon sa itinakdang
mga kondisyon.
Ipinaliwanag ni Wamil na hindi naman maaaring gamitin ang naturang pondo para sa suweldo, allowance, representasyon, consultancy, entertainment expenses, o pagpapatayo at pagbili ng mga gusali, maliban kung pinahihintulutan ng batas.
Bahagi ang testimonya ni Wamil sa paglalatag ng ebidensya ng House prosecution kaugnay ng audit sa ₱500 milyong confidential funds ng Office of the Vice President at ₱112.5 milyong confidential funds ng Department of Education.
