22,665 total reads
Umapela ng masusing pag-aaral at malalim na pananaliksik si Antipolo Bishop Ruperto Cruz Santos sa planong pagpapatupad o pagpapatayo ng Pax Silica sa Pilipinas.
Ito ay sa kanyang Diocesan Pastoral statement na “Discerning What Leads to True Peace.” Inihayag ng Obispo na mahalagang maunawaan ng bawat Pilipino ang posibleng epekto ng Pax Sillica sa bansa, partikular sa mamamayan, kalikasan, at pambansang kinabukasan.
Ipinaliwanag ni Bishop Santos na ang Pax Silica ay inisyatibang pinangungunahan ng Estados Unidos upang tiyakin ang pandaigdigang suplay ng semiconductors, artificial intelligence technologies, at iba pang kritikal na mineral.
“My dear faithful, not everything that promises progress brings peace. Not everything that offers development brings dignity. Not everything that shines is good for the soul of a nation. As the Diocese of Antipolo, we stand firm: Pax Silica is not beneficial, not the best, and not a blessing for us. Our mission is to safeguard our people, our land, and our future. Our responsibility is to uphold human dignity above economic gain. Our calling is to choose what leads to true peace—pax—not merely technological power. May the Lord grant us wisdom. May Our Lady of Peace and Good Voyage guide our national journey. May we always choose what is just, humane, and truly Filipino,” ayon sa mensahe ni Bishop Santos.
Ayon sa Obispo, bagama’t inaasahang magtatayo ng 4,000-acre industrial hub sa New Clark City bilang bahagi ng programa, ito ay pangunahing nakabatay sa pandaigdigang kompetisyon sa teknolohiya at seguridad, at hindi sa pangangailangan ng mga lokal na pamayanan.
Nagbabala rin ang Obispo sa mga posibleng idulot ng proyekto kabilang ang pagkasira ng kalikasan, paglilipat ng mga komunidad, pagtaas ng polusyon, at higit na pagkakasangkot ng Pilipinas sa hidwaan ng mga makapangyarihang bansa.
Iginiit ni Bishop Santos na kinakailangang pag-aralan mabuti ang mga pangmatagalang epekto ng Pax Sillica sa pambansang soberanya, kabuhayan ng mamamayan, at pangangalaga sa likas na yaman.
Binigyang-diin ni Bishop Santos na ang tunay na pag-unlad ay hindi lamang nasusukat sa paglago ng ekonomiya o pagpasok ng malalaking pamumuhunan, kundi sa paggalang sa dignidad ng tao, pangangalaga sa kalikasan, at pagsusulong ng tunay na kapayapaan.
“The best path for our nation is one that: protects our environment, strengthens local industries, empowers Filipino workers, and preserves our sovereignty. Pax Silica does not arise from Filipino priorities. It arises from global rivalry. What is “best” must be rooted in our values, our people, and our future—not in the agendas of powerful nations,” bahagi pa ng mensahe ni Bishop Santos.
Hinimok naman ng Obispo ang mga mananampalataya at mamamayan na maging mapanuri at piliin ang mga hakbang na nakaugat sa kabutihang panlahat at tunay na kapakanan ng sambayanang Pilipino.
