1,155 total reads
Ipinagdiriwang ng Little Sisters of Jesus–Philippines ang kanilang Golden Jubilee sa Agosto 15, 2026, tampok ang limang dekada ng tahimik na pakikipamuhay at pakikibahagi sa buhay ng mga ordinaryong Pilipino.
Sa panayam sa programang Barangay Simbayanan sa Radyo Veritas, ibinahagi ni Sr. Maria Elizabeth de Jesus, Social Communications in-charge ng Little Sisters of Jesus–Philippines na nagsimula ang kanilang misyon sa bansa noong 1976 matapos silang imbitahan ng yumaong si Marawi Bishop Bienvenido Tudtud na maglingkod sa Prelature of Marawi, sa panahong nakararanas ang lugar ng kaguluhan at karahasan.
“Nag-start kami dito noong 1976. In-invite kami ni Bishop Tudtud noon na pumunta sa Prelature of Marawi,” Bahagi ng pahayag ni Sr. Maria Elizabeth.
Bagama’t hindi sila tuluyang nakapagtatag ng permanenteng komunidad sa Marawi, nagkaroon ang kongregasyon ng mga presensya sa iba’t ibang komunidad, kabilang ang Boso-Boso, Bicutan, Iligan, Quezon City at ngayon ay sa Masbate at Mandaluyong.
Binigyang-diin ni Sr. Maria Elizabeth na ang kanilang misyon ay hindi lamang tungkol sa pangangaral o malalaking proyekto kundi sa simpleng pakikipamuhay sa mga tao.
“We live and we work like the people in the community through the ordinary presence of friendship like Jesus of Nazareth,” Paliwanag ni Sr. Maria Elizabeth.
Pagbabahagi ni Sr. Maria Elizabeth, nakikibahagi ang mga madre sa karaniwang trabaho ng mga komunidad, kabilang ang pagtatrabaho sa mga pabrika, bahay, bakery at iba pang blue-collar jobs upang mas makilala at makasama ang mga taong kanilang pinaglilingkuran.
Para kay Sr. Maria Elizabeth, mahalagang maranasan muna ang kanilang bokasyon upang tunay itong maunawaan.“It has to be lived,” Ani Sr. Maria Elizabeth.
Higit sa pakikiisa, tinukoy din ng madre ang kanilang buhay bilang isang “contemplative presence” o isang presensyang nakikinig sa kuwento at pakikibaka ng mga tao at dinadala ang mga ito sa panalangin.
“Hindi lang talaga ‘yan pakikiisa, kundi it’s a contemplative presence. ‘Yun ‘yung in-emphasize namin. We are not organizers, or to bring big projects, but it’s a contemplative life to be like Jesus in Nazareth… It is there that we encounter God in the daily struggles ng mga tao,” ani Sr. Maria Elizabeth.
Ayon sa kongregasyon, ang limang dekadang misyon ng Little Sisters of Jesus ay nagpapaalala na ang pagmimisyon ay hindi lamang nasusukat sa malalaking programa kundi sa presensya, pakikinig, pakikipagkaibigan at pakikibahagi sa buhay ng kapwa.
Pagbabahagi ni Sr. Maria Elizabeth, sa pagdiriwang ng kanilang Golden Jubilee ay patuloy na isinasabuhay ng Little Sisters of Jesus–Philippines ang espirituwalidad ng Nazareth, na tahimik ngunit tapat na presensya ni Hesus sa ordinaryong buhay bilang paraan ng pakikilakbay sa mga komunidad at paghahanap sa Diyos sa gitna ng kanilang pang-araw-araw na karanasan.
Nakatakda ang pagdiriwang ng ika-50 anibersaryo ng kanilang paglilingkod sa Pilipinas sa August 15, 2026 na gaganapin sa San Roque Parish sa Mandaluyong City, na pangungunahan ni Manila Archbishop Jose Cardinal Advincula.
