1,730 total reads
Hinikayat ng Society of St. Paul ang mga kabataan na higit na palalimin ang kanilang pagmamahal sa Salita ng Diyos at hindi lamang ito pag-aralan o isaulo, kundi isabuhay nang may pananampalataya at paninindigan.
Ito ang panawagan ni Father Angelo Paolo Asprer, SSP creative director ng St. Paul’s Publishing, Digital, Social Media and Biblical Initiatives, sa ginanap na 13th St. Paul National Bible Quiz (SPNBQ) National Championship ngayong September 12 sa Manila International Book Fair sa SMX Convention Center Manila sa Pasay City.
Ayon kay Fr.Asprer, bahagi ng misyon ng Society of St. Paul ang pagpapalaganap ng Bibliya, lalo na sa mga kabataan at pamilya, gamit ang pinakamabilis at pinakamabisang paraan ng komunikasyon dahil layunin ng National Bible Quiz na muling pag-alabin at patatagin ang pagmamahal ng kabataan sa Salita ng Diyos.
Iginiit ng pari na ang tunay na kompetisyon ay hindi lamang nagaganap sa loob ng Manila International Book Fair, kundi sa paraan ng pamumuhay ng mga kalahok matapos nilang matutuhan ang Salita ng Diyos.
Inihayag ni Father Asprer na hindi sapat na makamit lamang ng mga kalahok ang kaalaman sa Bibliya at dahil mas mahalaga ang pagsasabuhay nito nang may passion at commitment.
“And of course, to the participants of the St. Paul National Bible Quiz, congratulations, thank you very much for your passion for the word of God. Well, all the best in this competition, but as we would say, the real competition is outside. The walls of this Manila International Book Fair. So, it’s not just simply our search for for knowledge, but also, but above all else, you know, how we live the world, not just simply study the word, learn the word, memorize the word, but above all, live the world with passion and with commitment,” ayon sa panayam ng Radyo Veritas kay Fr.Asprer.
Kaugnay nito, ibinahagi nina Reighn David at Ramea Jeanel Guico, ng Mary Help of Christians College, San Jose del Monte at kalahok sa Bible Quiz Bee ang pasasalamat sa Society of St. Paul dahil kapwa nila itinuring na isang karangalan ang maging bahagi ng National Championship.
Taunang evangelization ministry ng Society of St. Paul ang St. Paul National Bible Quiz na nilalahukan ng mga kabataan mula sa iba’t ibang paaralan sa bansa upang palalimin ang kanilang kaalaman at pagmamahal sa Banal na Kasulatan sa pamamagitan ng friendly competition, pagkatuto at pananampalataya.
Isinagawa ang ika-13 edisyon ngayong taon sa temang “Sowers of the Word: Channels of Peace,” na nakatuon sa paghubog sa mga kabataang nagbabahagi ng Salita ng Diyos at nagsisilbing instrumento ng kapayapaan sa kanilang mga komunidad.
