43,706 total reads
Itinakda sa Oktubre 27 ang canonical possession at solemn installation ni Bishop-designate Crispin Varquez bilang ikawalong obispo ng Diocese of Tagbilaran.
Isasagawa ang seremonya alas-9 ng umaga sa St. Joseph the Worker Cathedral Shrine-Parish sa Tagbilaran City, Bohol.
Sa pahayag ng diyosesis, tinanggap nito bilang biyaya ang pagkakaroon ng bagong pastol na mangunguna sa mga gawaing pastoral at espirituwal para sa mahigit isang milyong mananampalataya.
“We give thanks to God for the gift of a new shepherd to lead our Diocese and accompany us in our journey of faith,” ayon sa pahayag ng diyosesis.
Pangungunahan ni Cebu Archbishop Alberto Uy ang seremonya ng pagluklok kay Bishop-designate Varquez, habang si Manila Archbishop Cardinal Jose Advincula ang magbibigay ng pagninilay.
Dadalo rin si Papal Nuncio to the Philippines Archbishop Charles Brown, kasama ang mga obispo mula sa iba’t ibang diyosesis.
Si Bishop-designate Varquez ay tubong Sevilla, Bohol at itinalaga ni Pope Leo XIV bilang bagong obispo ng Tagbilaran noong Setyembre 10, matapos ang halos isang taon na pagiging sede vacante ng diyosesis.
Naordinahang pari ng Tagbilaran noong Abril 14, 1989, nagpatuloy siya sa pag-aaral para sa seminary formation sa Cebu City at family counseling sa Center for Family Ministry ng Ateneo de Manila University.
Naging formator din siya sa Immaculate Heart Seminary sa Bohol at St. Augustine Major Seminary sa Tagaytay, bukod sa paglilingkod sa iba’t ibang tanggapan ng diyosesis, kabilang ang pagiging vicar general.
Noong Oktubre 18, 2007, itinalaga siyang obispo ng Diocese of Borongan, kung saan siya unang naglingkod bilang obispo.
