44,487 total reads
Hinamon ni Manila Archbishop Jose Cardinal Advincula ang mga deboto ng Our Lady of Sorrows na huwag manatili sa debosyon lamang, kundi isabuhay ito sa konkretong pagkalinga at pakikiisa sa mga taong dumaranas ng sakit, kahirapan at pang-aapi.
Sa kanyang homiliya sa ika-85 na patronal fiesta ng Our Lady of Sorrows Parish sa Pasay City, sinabi ni Cardinal Advincula na ang pagninilay sa mga dalamhati ng Birheng Maria ay dapat magbunsod sa mga mananampalataya na maging higit na sensitibo sa paghihirap ng kanilang kapwa.
“Our Lady’s sorrowful face thus prods us to concretely do something to alleviate the plight of our brothers and sisters and to also stand by them and for them at the foot of their crosses,” ayon kay Cardinal Advincula.
Ipinaliwanag ng kardinal na hindi ang pagdurusa mismo ang ipinagdiriwang sa kapistahan ng Our Lady of Sorrows, at hindi rin itinuturo ng pananampalataya na nalulugod ang Diyos sa paghihirap ng kanyang mga nilikha.
Binigyang-diin ni Cardinal Advincula na ang Diyos na lumilikha, tumutubos at nagpapabanal sa tao ay nagnanais ng ganap na buhay para sa lahat.
“Our God who creates, redeems, and sanctifies us only desires the fullness of life for all of us. Any assertion contrary to this is not in accord with Christian faith,” aniya.
“Sorrow becomes redemptive if it is because of and offered for others out of love.”
Sa pagninilay sa pitong dalamhati ni Maria, hinikayat ni Cardinal Advincula ang mga Kristiyano na magkaroon ng tapang na yakapin ang mga krus ng buhay, hindi dahil hinahangad ng Diyos ang kanilang paghihirap, kundi dahil sa pag-ibig sa Diyos at sa kapwa.
Iginiit niyang sa gitna ng mga pagsubok, nananatili ang Diyos na kasama ng tao at hindi siya iniiwan.
“Our Blessed Mother reminds us that we are never alone. Jesus is Emmanuel, God with us. Jesus never abandons us but fully understands us, especially when we go through the sorrowful mysteries of life.”
Katuwang ni Cardinal Advincula sa pagdiriwang sina Fr. Cris Robert Cellan, SSP, ang kasalukuyang kura paroko ng parokya; Fr. Mario Sobrejuanite, SSP, Provincial of the Society of St. Paul Philippines-Australia Province; mga Paulinong pari; at iba pang pari mula sa karatig na mga parokya.
