39,137 total reads
Anim sa bawat sampung Pilipino ang nagsabing kuntento sila sa performance ng kanilang district representative o kongresista, batay sa pinakahuling Tugon ng Masa survey ng OCTA Research.
Sa panayam sa Radyo Veritas, sinabi ni OCTA Research Fellow Dr. Guido David na 64 porsyento ng adult Filipinos ang nagsabing mahusay ang performance ng kanilang sariling district representative.
Isinagawa ang survey mula Hulyo 4 hanggang 11, 2026. Dalawampu’t pitong porsyento naman ang hindi sumang-ayon sa magandang performance ng kanilang kinatawan, habang siyam na porsyento ang hindi makapagpasya.
Mas mataas ito kumpara sa 37 porsyentong satisfaction rating ng House of Representatives bilang institusyon. Nasa 38 porsyento naman ang trust rating ng Kamara.
Ipinaliwanag ni David na maaaring mas nakikita ng mga botante ang trabaho at serbisyo ng kanilang sariling kongresista dahil direktang nakaugnay ito sa kanilang distrito
“Specifically, siguro, satisfaction is related to performance, so kung ano ‘yung ginagawa nila. Pero ang trust, mas universal ‘yung trust, parang tiwala ba kayo,” bahagi ng paliwanag ni David sa Radyo Veritas.
Samantala, sa parehong survey, 38 porsyento ang satisfied sa performance ng Senado, habang 37 porsyento naman para sa Kamara.
Binigyang-diin ni David na mahalaga para sa mga botante na makita ang kanilang mga halal na opisyal na nakatutok sa mga pangunahing problema tulad ng trabaho, sahod, kahirapan at korapsyon.
“Gusto nila, working for us. Kasi, tutal ‘yung taxpayers naman ‘yung nagpapasweldo sa ating mga senators, ‘di ba? So dapat ginagawa nila kung ano ‘yung para sa mga kababayan natin, which is nakafocus dito sa mga issues natin dito sa kagutuman, sa trabaho, sa sweldo, poverty,” Ani David.
Nilinaw naman niya na hindi direktang sinukat ng survey kung bakit kuntento ang mga respondent o kung personal nilang kilala ang kanilang district representative.
Mahalaga rin aniya ang patuloy na pagsusuri ng mga botante sa performance ng kanilang mga kinatawan, lalo na habang papalapit ang halalan.
