45,506 total reads
Magdaraos ang Conference of Major Superiors in the Philippines (CMSP) ng Misa ng Bayan bilang paggunita sa Batas Militar, at pag-alala sa mga karanasan ng mga Pilipinong dumanas ng pagdurusa sa panahong iyon.
Isasagawa ang banal na misa sa Setyembre 21, 2026, alas-10 ng umaga, sa Cubao Cathedral, Quezon City, na pangungunahan ni Cubao Bishop Elias Ayuban Jr., CMF, DD, JCD.
Inaanyayahan ng CMSP ang mga consecrated persons, religious communities, clergy, lay partners at lahat ng taong may mabuting kalooban na makiisa sa panalangin at paggunita sa mga karanasan ng mga nagdusa sa panahong ito ng kasaysayan ng bansa.
Layunin din ng pagtitipon na dalhin sa panalangin ang patuloy na pagsusulong ng dignidad ng tao, katotohanan, katarungan, pagkakasundo at pangmatagalang kapayapaan.
“The Conference of Major Superiors in the Philippines (CMSP) invites consecrated persons, religious communities, clergy, lay partners, and all people of goodwill to gather in prayer and remembrance. As we remember this chapter of our nation’s history, we bring before the Lord the experiences of those who suffered and all who continue to work for human dignity, truth, justice, reconciliation, and lasting peace.” Bahagi ng pahayag ng CMSP.
Hinihikayat ng CMSP na ang pag-alala sa nakaraan ay magsilbi ring paalala sa tungkuling maging mga tagapagtatag ng kapayapaan at mga saksi sa katotohanan.
Tema ng nakatakdang Misa ng Bayan ang “Katotohanan at Katarungan: Landas Tungo sa Kapayapaan,” na magsisilbing pagkakataon upang tipunin sa panalangin ang mga consecrated persons, religious communities, kaparian, lay partners, at lahat ng taong may mabuting kalooban.
Ayon sa CMSP, sa paggunita sa isang mahalagang kabanata ng kasaysayan ng bansa ay muling maihaharap sa Panginoon ang mga karanasan ng mga nagdusa, gayundin ang patuloy na pagsusulong para sa dignidad ng tao, katotohanan, katarungan, pagkakasundo, at pangmatagalang kapayapaan.
“May our remembering deepen our commitment to become peacemakers and witnesses to the truth in our wounded world.” Dagdag pa ng CMSP.
Hinihikayat din ng grupo ang mga dadalo na gawing daan ang pag-alala upang higit na pagtibayin ang paninindigan sa katotohanan at katarungan at ang pagiging mga tagapagtatag ng kapayapaan sa gitna ng mga sugat at hamon ng lipunan.
Ang paggunita ay magsisilbi ring paalala na ang pananampalataya ay may pananagutan sa pagtatanggol sa dignidad ng bawat tao at sa pagsusulong ng katotohanan, katarungan, pagkakasundo, at kapayapaan.
