1,516 total reads
Pinasinayaan ngayong araw sa SMX Convention Center sa Pasay ang Beauty + Health Wellness Manila, Airtech Philippines 2026 at Hotel and Food Service Suppliers Show 2026.
Ang industry expo ay pagtitipon ng mga kompanya, retailers, negosyante, Micro, Small and Medium Enterprises o MSMEs, at iba pang kabilang sa mga kaugnay na industriya kung saan kabilang sa event organizers at benefactors ang Hotel and Restaurant Association of the Philippines.
Iginiit ni Eugene Yap, head ng H-R-A-P ang kahalagahan ng industry expo bilang pagkakataon para makakilala ang mga bagong produkto, supplier at teknolohiya na makatutulong sa pagpapaunlad ng mga hotel at restaurant sa bansa.
Ayon kay Yap, mahalaga ang ganitong mga pagtitipon upang mapalawak ang kaalaman ng mga negosyo sa mga produktong gawa sa Pilipinas, gayundin sa mga international suppliers, at makahanap ng mga bagong kagamitan at solusyon para sa kanilang mga pasilidad.
Sinabi ni Yap na makatutulong ang mga bagong produkto, impormasyon at supplier na matutuklasan sa expo upang higit na mapabuti ang serbisyo para sa mga lokal at dayuhang bisita.
Binigyang-diin naman ni Department of Tourism Assistant Secretary for Branding and Marketing Communications Gissela Marie Quisumbing ang malaking potensyal ng health, medical travel at wellness tourism bilang mga mahalagang haligi ng pag-unlad ng turismo sa Pilipinas.
Ayon kay Quisumbing, umaabot na sa 6.3 trillion US dollars ang pandaigdigang wellness economy, na lumalago ng average na 5.9 percent kada taon at mas mabilis kaysa sa global GDP.
Ginagamit ng Pilipinas ang mayamang healing traditions ng mga Pilipino, kabilang ang hilot, lokal na pagkain, herbal treatments, indigenous oils at musika, upang makalikha ng natatanging Filipino wellness experience at mapalakas ang medical at wellness tourism sa bansa.
Kaugnay nito, mahigit 500 local at international brands ang lumahok sa tatlong expo na sumasaklaw sa mahigit 12,500 square meters na exhibition space at inaasahang tatanggap ng mahigit 15,000 trade buyers at decision-makers.
Ayon kay Quisumbing, mahalaga rin ang mga bagong kagamitan, teknolohiya at sustainable solutions na ipinapakita sa mga expo upang mapataas ang pamantayan ng serbisyo, kaligtasan at energy efficiency ng mga hotel, resort, restaurant at wellness facilities.
Kabilang din sa mga exhibitors ang Caritas Manila-Segunda Mana Program, na naglalayong ipakilala ang mga pangunahing programa nito at mahikayat ang publiko na maging daluyan ng pagmamahal at habag sa kapwa sa pamamagitan ng kanilang mga donasyon.
Maiuugnay naman ang pagsusulong ng sustainable at energy-efficient tourism infrastructure sa panawagan ni Pope Francis sa Laudato Si’ para sa responsableng paggamit ng mga yaman at pag-unlad na isinasaalang-alang hindi lamang ang paglago ng ekonomiya kundi pati ang kalusugan ng tao, kapwa at pangangalaga sa kalikasan.
Magpapatuloy ang tatlong araw na expo hanggang September 20 sa SMX Convention Center sa Pasay.
