33,807 total reads
Binigyang-diin ng Theologian na si Ivan Efraim Gozum, OP ang kahalagahan ng human oversight sa paggamit ng artificial intelligence o AI, upang mapanatili ang transparency at critical thinking sa gitna ng mabilis na pag-unlad ng teknolohiya.
Ayon kay Gozum, malaki ang naitutulong ng AI sa mga guro at mananaliksik, kabilang ang paggawa ng mga tanong, pagpapasimple ng mga lesson at pagbuo ng research outlines.
“The first for us is the importance of human oversight. Kasi sa human oversight, doon po natin makikita yung transparency, kasi baka sunod lang tayo nang sunod sa rekomendasyon ng AI. And may ano nga po, nabasa ko, and minsan, triny ko rin po, ako rin na parang kapag mas ginagamit mo yung AI, parang tinatry niyang mag-agree nang mag-agree sa ideas mo, yung parang ano mo, parang kaibigan mo na oo lang nang oo sa’yo. So, nabubuild niya yun na parang tama lahat. So, ngayon, dahil dito, kaya nagkakaroon ng human oversight, transparency, nagkakaroon ng human, ng critical thinking doon sa process,” ayon sa panayam kay Gozum sa programang Baranggay Simbayanan ng Radyo Veritas.
Binigyang-diin din niya ang panganib ng AI sa tinatawag na “deskilling,” kung saan maaaring mawalan o mabawasan ang kasanayan ng mga manggagawa dahil napapalitan ng teknolohiya ang ilang dating gawain, partikular sa mga sektor na gumagamit ng artificial intelligence para pabilisin ang proseso ng trabaho.
Ibinahagi ni Gozum na mula sa sarili niyang karanasan sa call center industry, may mga dating non-voice workers na maaaring maapektuhan ng AI dahil kaya na nitong gawin ang ilan sa kanilang mga gawain, kaya mahalaga aniya ang isang “just transition” upang mabigyan ang mga manggagawa ng pagkakataong matuto ng bagong skills at hindi maiwan sa pagbabago ng ekonomiya.
Samantala, binigyang-diin din ni Gozum ang kahalagahan ng human encounters, matapos niyang mapansin ang pag-usbong ng AI companionship kung saan mas pinipili ng ilan na makipag-usap sa AI kaysa sa kapwa tao, bagay na aniya ay maaaring makaapekto sa authenticity ng relationships at sa mismong proseso ng pagiging tao.
