324 total views
Pinakikilos na ng Catholic Bishops Conference of the Philippines – Permanent Committee on Public Affairs (CBCP – PCPA) ang simbahan upang masolusyunan ang problema sa El Nino sa Mindanao.
Ayon kay Lipa Archbishop Ramon Arguelles kinakailangan magdamayan ang taumbayan upang matulungan ang mga magsasaka na nagugutom dahil sa pagkalugi ng kanilang lupang sakahan.
Giit pa ng arsobispo na wala na itong tiwala sa pamahalaan na tutugunan nito ang problemang kinakaharap ng mga magsasaka.
“Ang solusyon diyan ay hindi naman magagawan ng paraan ng pamahalaan na maglagay ng tubig maliban dun sa low range. Ang panawagan natin ay magtulungan ang mga tao dahil matindi talaga ang init diyan, hindi natin asahan ang gobyerno lalo na ng tutulong sa mga mahihirap ‘no way,’ ang problema ay pinapaasa ang mga magsasaka,” bahagi ng pahayag ni Archbishop Arguelles sa Radyo Veritas.
Kinakailangan magtulungan ng mga simabahan at mga non – government organizations upang tul;uyang makabangon ang mga ito sa matinding epekto ng tag–tuyot.
“Dapat ang simbahan at non – government organization magtulungan, wala akong tiwala sa gobyerno para sila pa nga ang nagke – create ng mga ganitong climate changes. Wala akong panawagan sa gobyerno sapagkat ang alam yan hindi lang elite kundi wala talagang pagmamahal yan sa mga mahihirap. Panawagan ko sa lahat ng sambayanan na damayan itong iba,” giit pa ng arsobispo sa Veritas Patrol.
Nauna ng iniulat ng Department of Agriculture na umakyat na sa P4.7 bilyong piso ang kabuuang halaga ng mga pananim na nasira dulot ng grabeng El Niño na nararanasan ngayon sa malaking bahagi ng bansa.
Nabatid na mula noong February 2015 hanggang February 2016 nasa 300 libong ektarya ng mga taniman ng ibat-ibang mga produkto ang naapektuhan ng El Niño.
