412 total reads
Nararapat magdeklara ng tigil putukan ang kampo ng Communist Party of the Philippines-New People’s Army-National Democratic Front (CPP-NPA-NDF) upang maging tunay na makabuluhan ang pagsisimula ng peace talks.
Ayon kay Manila Auxiliary Bishop Broderick Pabillo, Chairman ng CBCP – Episcopal Commission on the Laity, magkakaroon lamang ng positibong resulta ang negosasyon sa pagitan ng pamahalaan at komunistang grupo kung makakapag-usap at tunay na makikipagtulungan ang magkabilang kampo at dadaanin sa payapa ang proseso.
“Inaantay natin ang sagot ng CPP-NPA, ano yung kanilang response sa Unilateral na pag-Ceasefire ng gobyerno, sana maging generous din ang kanilang response mag-response sila para at least hindi na magkaroon ng away habang nag-ne-negotiation sila, mag-ceasefire din sila para mas maging maayos ang kanilang dialogue…”pahayag ni Bishop Pabillo sa panayam sa Radio Veritas.
Matapos bawiin ng Pangulong Rodrigo Duterte ang unang idineklarang “unilateral ceasefire” dahil sa labanan sa pagitan ng grupong New People’s Army at AFP-Civilian Auxiliary sa Davao del Norte, inaasahang ipagpapatuloy pa rin ng pamahalaan ang nakatakdang peace talks sa ika-20 ng Agosto sa Oslo, Norway kung saan inaasahan na rin ang pagdideklara ng NDF ng Unilateral Ceasefire.
Bukod sa tigil putukan, inaasahan rin ang pagpapalaya sa mga political prisoners na batay sa tala ng Karapatan (Alliance for the Advancement of People’s Rights) mula sa pinakahuling tala noong ika-31 ng Mayo ay 297 mula sa 509 na political prisoners ang ilegal na inaresto sa ilalim ng Administrasyong Aquino.
Sa nasabing bilang, 18 ang naitalang mga peace consultants ng NDFP, 88 ang may karamdaman, 48 naman ang mga matatanda habang tinatayang nasa 74 na mga detainees naman sa buong bansa ay nananatiling walang hatol sa loob ng higit na 10-taon.
