662 total views
Nanawagan si running priest at GomBurZa lead convenor Father Robert Reyes sa mga botante na piliin ang mga kandidatong may tunay na hangaring maglingkod sa bayan.
Ito ang mensahe ng pari kasunod ng isinagawang penitential walk ng mga pari ng Metro Manila sa paggunita ng ika – 150 anibersaryo nina Padre Mariano Gomez, Padre Jose Burgos at Padre Jacinto Zamora o ang GomBurZa Fathers.
Ayon sa pari, maipakikita ng mamamayan ang pagmamahal sa bayan sa paghalal ng mga kandidatong karapat-dapat iluklok sa posisyon.
“Dapat makita sa boto ninyo ang pagmamahal sa bayan, hindi na pwede ngayon ang bumoto ng tahimik kailangang manindigan sa etikal, moralidad, katotohanan at katarungan kaya piliin ang kandidatong magmamahal sa bayan,” pahayag ni Fr. Reyes sa panayam ng Radio Veritas.
Iginiit ng pari na ang diwa ng GomBurZa ay integral faith kung saan kaakibat ng pagmamahal sa Diyos ay ang pagmamalasakit sa bayan lalo na sa mamamamayan
Hinimok din ni Fr. Reyes ang mahigit 60-milyong botante na suriin ang kasaysayan kabilang na ang pamamahala matapos ang ikalawang digmaang daigdig.
Batid ng pari ang kaakibat na panganib sa muling pagpapapili ni Ferdinand Marcos Jr. kung saan nabalot sa labis na katiwalian at karahasan ang paninilbihan ni dating pangulong Ferdinand Marcos.
“Kung iboto natin yan [Bongbong Marcos] ang boto natin ay pumipikit at tinatalikuran ang isang mahalagang yugto, madilim at mapait ngunit totoong yugto ng pananamanatala ng mga Marcos sa kapangyarihan,” ani Fr. Reyes.
Layunin ng penitential walk na inisyatibo ng Manila clergy ay upang ipanalangin ang nalalapit na 2022 National and Local Elections at isabuhay ang pagiging kristiyano sa pagpili ng mga susunod na lider ng bansa.
“May we ask our fellow Filipino to be ‘maka-Diyos kaya makabayan’ to discern their choice well and prefer leaders embody and promote the values of the Kingdom of God,” bahagi ng pahayag ng Manila clergy.
Taong 1872 nang paslangin sa pamamagitan ng ‘garrote’ ang tatlong diocesan priest ng Manila makaraang paratangan ng pagsisinungaling ng gobyernong kolonyal ng mga Español.
Pinangunahan ni Cardinal Jose Advincula ang banal na misa sa Manila Cathedral na sinundan ng penitential walk patungo sa GomBurZa memorial marker sa Luneta at nagtapos sa panalangin sa Nuestra Señora de Guia sa Ermita.
Bukod sa mga pari, religious men and women ng Archdiocese of Manila dumalo rin sa pagtitipon si Novaliches Bishop Emeritus Teodoro Bacani Jr at mga pari sa mga diyosesis ng Metro Manila at karatig lalawigan.
