277 total views
Binigyang-diin ni Fr. Almar Roman, MI, chaplain ng Philippine Heart Center (PHC), na ang tunay na kagalingan ay hindi lamang nakatuon sa pisikal na kalusugan kundi sa buong aspeto ng pagkatao.
Sa pagdiriwang ng Kapistahan ng Kalinis-linisang Puso ni Maria sa Immaculate Heart of Mary Chapel ng Philippine Heart Center, inihayag ng pari na si Maria ay patuloy na nagsisilbing huwaran ng pananampalataya at pag-asa lalo na para sa mga dumaranas ng karamdaman at pagsubok sa buhay.
“Sa Puso ni Maria, may kagalingan. Hindi lamang kagalingan ng katawan, kundi kagalingan ng puso, isip, kaluluwa, at buong buhay,” ayon kay Fr. Roman.
Paalala rin ng pari na ang Mahal na Birheng Maria ay hindi kailanman nang-iiwan sa kanyang mga anak, lalo na sa mga nahaharap sa pagdurusa at kawalang-katiyakan.
“Maraming naririto ngayon ang dumaraan sa karamdaman, pagod, takot, at mga laban sa buhay. Ngunit ang mensahe ng Immaculate Heart ay ito: Hindi ka nag-iisa. May ina na nananatili sa tabi mo,” ani Fr. Roman.
Ayon sa pari, ang mensaheng ito ay mahalagang paalala lalo na para sa mga pasyente, kanilang mga pamilya, at maging sa mga healthcare workers na araw-araw na humaharap sa mga hamon ng pangangalaga sa buhay ng tao.
“Sa bawat buntong-hininga sa mga pasilyo ng ospital, sa bawat gabing hindi makatulog dahil sa sakit o pag-aalala, kasama natin si Maria,” dagdag ng pari.
Binigyang-diin din ni Fr. Roman na ang kadalisayan ng puso ay hindi nangangahulugang kawalan ng sugat o paghihirap, kundi ang patuloy na pagbubukas ng sarili sa Diyos sa gitna ng mga pagsubok.
“Ang pusong malinis ay hindi pusong walang sugat. Ang pusong malinis ay pusong bukas sa Diyos sa gitna ng sugat,” aniya.
Kasabay nito, hinimok ng pari ang mga mananampalataya na magtiwala sa Diyos sa kabila ng mga bagay na hindi maunawaan at hindi makontrol sa buhay.
Sa kanyang mensahe para sa komunidad ng Philippine Heart Center, binigyang-diin din ng chaplain ang kahalagahan ng pagpapanatili ng pag-asa, pananampalataya at dignidad ng bawat tao sa gitna ng paglilingkod sa mga may karamdaman.
“Hilingin natin na sa bawat paglilingkod natin dito sa ospital, mapangalagaan natin ang tatlong bagay: ang pag-asa, ang pananampalataya, at ang dignidad ng bawat tao,” ani Fr. Roman.
Samantala, sa kanyang panayam matapos ang misa, tiniyak ng pari ang patuloy na pananalangin ng komunidad para sa mga maysakit, lalo na sa mga nakararanas ng pag-iisa at kawalan ng pag-aaruga.
“Dalangin po namin ang inyong mabilis na paggaling, lalo na ang mga walang nakakaalala, ang mga walang nag-aalaga, at ang mga may sakit sa kanilang mga tahanan,” pahayag ni Fr. Roman sa Radyo Veritas.
Panawagan ng pari sa bawat isa na ipagkatiwala sa Kalinis-linisang Puso ni Maria ang lahat ng takot, karamdaman at pasanin sa buhay, kalakip ang katiyakang hindi kailanman pinababayaan ng Diyos ang Kanyang bayan.
