271 total views
Cardinal Advincula, nagpaabot ng pakikiisa at panalangin sa mga naapektuhan ng lindol sa GENSAN at karatig lugar
Nagpahayag ng pakikiisa at panalangin si Manila Archbishop Cardinal Jose Advincula para sa mga biktima ng magnitude 7.8 na lindol na yumanig sa General Santos City at mga karatig na lugar.
Batid ng kardinal ang pangamba at takot ng mga mamamayang apektado ng pagyanig kaya’t tiniyak nito ang patuloy na pananalangin para sa kahinahunan at katatagan.
“With deep sorrow, I join our brothers and sisters in General Santos City and the surrounding communities who have been affected by the recent earthquake,” pahayag ni Cardinal Advincula sa Radyo Veritas.
Hinikayat din ng arsobispo ang mga mananampalataya na makiisa sa karanasan ng mga biktima ng lindol sa pamamagitan ng paglingap, lalo na sa kanilang mga pangunahing pangangailangan.
“In these difficult moments, may we draw strength from our faith and from the solidarity of one another,” dagdag ng cardinal.
“I also encourage all people of goodwill to extend whatever assistance they can to those in need.”
Dalangin ni Cardinal Advincula ang kaligtasan, kaginhawaan, at pag-asa ng mga naapektuhan ng sakuna, gayundin ang paggabay ng Diyos sa mga rescuer, emergency responders, at mga lokal na opisyal na nangunguna sa paghahatid ng tulong at sa pagbangon ng mga komunidad.
Sa pamamagitan ng panalangin at pagkakaisa, umaasa ang cardinal na makakamit ng mga apektadong mamamayan ang kinakailangang suporta at lakas upang malampasan ang pagsubok na dulot ng lindol.
Sa datos ng Philippine Institute of Volcanology and Seismology (Phivolcs), alas 7:37 ng umaga noong June 8 nang mangyari ang tectonic quake sa lugar.
Ayon naman sa Office of Civil Defense naitala na sa 19 ang nasawi sa lindol, mahigit sa 100 ang nasutagan habang maraming gusali naman ang napinsala kabilang ang mga simbahan.
