452 total views
Opisyal ng inilabas ang theme song ng World Youth Day 2027 bilang hudyat ng isang taong countdown bago ang pandaigdigang pagtitipon ng mga kabataang Katoliko na gaganapin sa Seoul, South Korea mula Agosto 3 hanggang 8, 2027, na inaasahang dadaluhan ni Pope Leo XIV.
Pinamagatang “Confidite, Ego Vici Mundum” (“Take Courage! I Have Overcome the World”), ang opisyal na awitin ay hango sa mensahe ni Hesus sa Ebanghelyo ni San Juan na naghihikayat sa mga mananampalataya na magtiwala at magkaroon ng tapang sa gitna ng mga pagsubok sa buhay.
Kasabay rin ng paglulunsad ng official theme song ay ang pagsisimula ng isang global tree-planting campaign na inspirasyon ng encyclical ni Pope Francis na Laudato Si’, bilang pagpapakita ng pangangalaga sa kalikasan at sa ating nag-iisang tahanan.
Ayon kay Archbishop Peter Soon-taick Chung – President ng Local Organizing Committee for World Youth Day (WYD) Seoul 2027, nakatuon ang paghahanda ng Simbahan sa Korea upang maging makabuluhang pagdiriwang ng pananampalataya ang World Youth Day.
“We will do everything possible to make WYD Seoul 2027 a celebration of hope and a witness to the hospitality and solidarity of Korea and Seoul,” Bahagi ng pahayag ng Arsobispo.
Dagdag pa ng Arsobispo, ang nalalabing isang taon ay ilalaan sa masusing paghahanda upang maipamalas ang mainit na pagtanggap sa mga kabataang magmumula sa iba’t ibang panig ng mundo.
“The year ahead will be the time to complete our preparations and welcome young people from every part of the world.” Dagdag pa ng Arsobispo.
Ang nakatakdang World Youth Day Seoul 2027 ay maituturing na kauna-unahang WYD na gaganapin sa isang bansang hindi Kristiyano ang mayorya ng populasyon at ikalawang pagkakataon lamang na idaraos ito sa Asya, kasunod ng ginanap na World Youth Day sa Pilipinas noong 1995.
Patuloy na itinataguyod ng World Youth Day ang pagkakaisa ng mga kabataang Katoliko mula sa iba’t ibang bansa, kultura, at wika sa iisang pananampalataya kay Kristo.
Sa pamamagitan ng tema nitong “Take Courage! I Have Overcome the World,” inaanyayahan ang mga kabataan na maging mga saksi ng pag-asa, tapang, at pagmamahal ni Kristo sa gitna ng mga hamon ng makabagong panahon.
