16,670 total reads
Nanawagan si Caritas Philippines President at San Carlos Bishop Gerardo Alminaza ng patuloy na pagkakaisa at pagkilos ng mamamayan sa paggunita sa ika-54 na anibersaryo ng deklarasyon ng Martial Law noong panahon ni dating Pangulong Ferdinand Marcos Sr.
Ito ang mensahe ni Bishop Alminaza sa isinagawang Mass of Hope and Prayer for the Philippines sa San Agustin Church sa Intramuros, Maynila, kung saan binigyang-diin niya na bagama’t natapos na ang Martial Law, nananatili ang ilan sa mga epekto nito, kabilang ang takot at kultura ng impunity, habang patuloy ding hinaharap ng bansa ang katiwalian.
Ayon kay Bishop Alminaza, mahalagang panghawakan ang pag-asa sa kabila ng mga suliraning kinakaharap ng bansa at huwag sumuko sa kawalang-pag-asa.
Hinimok ng Obispo ang mamamayan na maging “liwanag ng pag-asa” at makilahok sa pagsusulong ng pagbabago, kabilang ang panawagan para sa pagpasa ng batas laban sa political dynasties at pananagutan ng mga sangkot sa mga paglabag.
Binigyang-diin din ni Bishop Alminaza na may magagawa ang mamamayan upang tugunan ang mga problema ng bansa, lalo na ang konsentrasyon ng kapangyarihang pampolitika sa iilan.
“Kaya kailangan tayo sama-sama na magtugon doon sa panawagan. Kailangan kasi ang hope na itaguyod kasi madali mag-succumb to hopelessness kasi ang dami na ngang suliranin. Pero kahit na hindi pa lubos na natugunan yung problema, kailangan pa rin tayong magpatuloy, hindi huminto. Dapat maging liwanag tayo ng pag-asa,” ayon sa panayam ng Radyo Veritas kay Bishop Alminaza.
Nanindigan naman si United Church of Christ in the Philippines Bishop Victor Paller sa pakikiisa ng kanilang simbahan sa paggunita sa madilim na bahagi ng kasaysayan ng Pilipinas sa ilalim ng Martial Law, kabilang ang pag-alala sa mga buhay na nawala, mga dinakip, dinukot at pinaslang, gayundin ang mga paglabag sa karapatang pantao noong panahong iyon.
Hinimok ni Bishop Paller ang mga mamamayan na magkaisa upang matiyak na hindi na mauulit ang karahasang iniuugnay sa Martial Law, habang binanggit din ang usapin ng korapsyon at pangangailangang papanagutin ang mga sangkot.
Ayon kay Bishop Paller, ipinakikita ng pagkakaisa ng iba’t ibang denominasyon at simbahan na sa kabila ng pagkakaiba sa pananampalataya, nagkakaisa ang mga mamamayan sa pagtutol sa karahasan, kahirapan at kawalang-katarungan.
“Nais kong ipahatid sa pamamagitan din ng aming simbahan ang pakikipagkaisa sa pag-alala sa madilim na bahagi ng kasaysayan ng Pilipinas kung saan napakaraming buhay ang nawala, dinakip, dinukot, pinaslang, at mula doon ay naranasan ang napakalaganap na paglabag sa karapatang pantao. Hindi na ito dapat magpatuloy, hindi dapat maulit. Kaya kami sa taong simbahan ay kasama ng mga mamamayan at hinihikayat ang bawat isa na atin ipakita na kailanman ay hindi natin papayagang maulit ang karahasang dulot ng Martial Law. Patuloy din ang aming panawagan: lahat ng sangkot, dapat managot,” bahagi pa ng mensahe ni Bishop Paller sa kaniyang panayam sa radyo Veritas.
Kasama ang United Church of Christ in the Philippines sa isinagawang Misa para sa Pag-asa na pinangunahan ni Bishop Alminaza, na nilahukan din ng iba pang ecumenical at multisectoral groups bilang pag-alala sa kasaysayan ng bansa at panawagan para sa pagkakaisa, pag-asa at katarungan.
