413 total reads
Hinimok ni Taytay Palawan Bishop Broderick Pabillo ang mga mananampalataya na tumindig, huwag matakot, at isabuhay ang tunay na diwa ng Kuwaresma bilang pakikiisa sa paghihirap at tagumpay ni Hesus.
Sa kanyang homiliya sa ikalawang Linggo ng kuwaresma, iginiit ng obispo na ang mga gawain sa kuwaresma ay hindi lamang tradisyon kundi malinaw na paanyaya sa landas tungo sa pagbabagong-buhay.
“Tumindig na tayo at gawin ang mga gawain ng kuwaresma – magdasal, magpenitensiya at magkawanggawa. Huwag tayong matakot,” panawagan ni Bishop Pabillo.
Ipinaliwanag ng obispo na malinaw ang layunin ng bawat sakripisyo at pagtalikod na isinasagawa ng mga Kristiyano sa panahon ng Kuwaresma na makiisa sa tagumpay at kaluwalhatian ni Hesus sa kanyang muling pagkabuhay.
Ayon kay Bishop Pabillo, ang pagbabagong-anyo ni Hesus ay paalala na ang paghihirap ay hindi ang wakas kundi daan patungo sa kaluwalhatian.
“Ang kaluwalhatian ni Jesus sa kanyang pagbabagong anyo ay isang assurance ng kagandahan at kaluwalhatian na mapapasaatin, pero bago tayo makarating doon, dadaan muna tayo sa krus,” paliwanag ng obispo.
Kaugnay nito, hinamon ng obispo ang mga mananampalataya na iwan ang kanilang mga nakasanayan at tumugon sa paanyaya ng Panginoon.
“Iwanan natin ang ating comfort zone at sumunod kay Jesus ngayong kuwaresma,” giit ni Bishop Pabillo.
Tinukoy rin ng obispo ang halimbawa ni Abram sa unang pagbasa na iniwan ang kanyang bayan at katiyakan upang sundin ang tawag ng Diyos, tanda ng ganap na pagtitiwala at pananalig.
Binigyang-linaw ng obispo na ang tunay na diwa ng Kuwaresma ay hindi lamang pag-aayuno at panlabas na penitensiya kundi ang panloob na pagbabago.
“Ang mga ito ay magdadala sa atin ng pagbabago, at magandang pagbabago! Kailangan tayong manalig na ito ay mangyayari,” ani ng obispo.
Dagdag pa niya, hindi dapat panghinaan ng loob ang mga mananampalataya sa harap ng sakripisyo at pagsubok dahil hindi nagtatapos sa paghihirap ang karanasan ni Hesus sa krus.
Tiniyak ni Bishop Pabillo na ang pagsama kay Kristo sa paghihirap ay may kaakibat na pakikiisa sa Kanyang tagumpay.
“Kung kasama natin siya sa pagkamatay sa lumang pagkatao natin na nagdadala ng katamaran, ng bisyo at ng galit at hinala, makakasama din niya tayo sa kaluwalhatian ng bagong buhay.”
Ang mensahe ng obispo ay paanyaya sa bawat mananampalataya na yakapin ang Kuwaresma bilang panahon ng tapang, pagtitiwala, at pag-asa sa pangakong bagong buhay kay Kristo.
