28,771 total views
Ipinahayag ng liderato ng Kamara ang buong suporta sa panawagan na buksan sa publiko ang mga deliberasyon ng bicameral conference committee, bilang bahagi ng mas malawak na reporma sa proseso ng pambansang badyet sa nalalapit na pagbubukas ng ika-20 Kongreso sa Hulyo.
Layunin ng kampanyang #OpenBicam na gawing bukas at transparent ang huling bahagi ng deliberasyon ng Kamara at Senado sa pambansang badyet—isang yugto na kadalasang hindi na nasasaksihan ng publiko.
Kabilang naman sa iminumungkahi ni House Speaker Martin Romualdez, ang pagla-livestream ng bicam hearings upang mabigyan ng real-time access ang publiko at iba’t ibang sektor, at mapalalim ang kanilang pag-unawa at pagsusuri sa paggamit ng pondo ng bayan.
“Transparency and accountability must be the cornerstones of the budget process,” ayon kay Speaker Romualdez.
“I support the move to make bicameral conference committee discussions open to the public. This is a crucial step in restoring public trust and ensuring that the national budget truly reflects the will and welfare of the people.”
Iginiit din ng pinuno ng Kamara na ang mga repormang naisulong noong ika-19 na Kongreso, lalo an ang pagpapasa ng mga panukalang nagpapalakas sa transparency at accountability, ay nagsilbing matibay na pundasyon para sa mas bukas na pamamahala.
Tiniyak din niya ang pakikipagtulungan sa mga kasamahan sa Kamara at Senado upang maisabatas at maging bahagi ng institusyon ang adbokasiyang #OpenBicam.
Bilang panawagan, hinikayat ni Romualdez ang mga civil society organizations, akademya, media, at bawat mamamayan na aktibong makilahok, makinig, at magsubaybay sa buong proseso ng pagbuo ng pambansang badyet, bilang bahagi ng kanilang karapatan at responsibilidad bilang mamamayan.
