Hinimok ng mga Obispo ng Simbahang Katolika ang mga Pilipino na gumawa ng kawanggawa sa kapwa sa halip na gumastos sa pagsasagawa ng mga costume party.
Ipinaalala ni incoming Archdiocese of Ozamiz, Bishop Martin Jumoad na hindi makatutulong sa paglago ng pananampalataya ang mga halloween parties.
Iminungkahi ni Bishop Jumoad na sa mga mananampalataya na tulungan ang mga biktima ng bagyo at ipadama sa kanila ang habag at awa ng Panginoon sa halip na magsagawa ng “trick or threat”.
“Why use things that are not essential in our faith? Sana po nahihirapan tayo ngayon, bakit mag – halloween, halloween pa. Hindi naman yun essential sa ating pananampalataya. Why you plan to use halloween costumes, why not to share because we are now on the Year of Mercy. Look for a place that are really suffering like in Northern Luzon there are so many people who are suffering because of the typhoon Lawin and Karen. Cancel your halloween parties and divert your money in helping the poor, those who are affected by the typhoon Lawin and Karen in Batanes and in Norther Luzon,” pahayag ni Bishop Jumoad sa panayam ng Veritas Patrol.
Sang-ayon si Diocese of Laoag Bishop Renato Mayugba na isang napakagandang – alternatibo na ilaan na lamang ang salapi sa pagtulong sa mga biktima ng bagyo lalo na sa kanilang diyosesis sa halip na igugol ito sa mga halloween costumes at party na maituturing aniyang hindi maka – Kristiyanong gawain kundi isang pagan practice.
Hinikayat ni Bishop Mayugba ang mga Pilipino na gawing banal ang All Saints’ at All Souls’ day bilang pagpupuri sa mga Santo at yumaong mahal sa buhay.
“Napaganda yang alternative lalo na ang halloween party is a pagan practice and actually unchristian. Huwag na lang gumawa ng halloween party dahil ang ating kinikilala ay All Saints and All Souls Day. Ang ating pagdiriwang ay ang pagpapahalaga sa mga santo at santa kabilang na diyan ang ating mga kapamilya, magulang at kaibigan na yumao na. Mas mahalaga yun kaysa halloween party,” paalala ni Bishop Mayugba sa mga mananampalataya.
Nabatid na sa isang bansa na may tradisyunal na pagbisita sa mga sementeryo o libangan ng mga yumao tuwing Nobyembre 1 at 2 naitala ng Asia News na sa Manila pa lamang ay 500 libo na ang mga mananampalatayang tumutungo sa lalo na sa Manila North and South Cemetery.
Patuloy naman ang paalala ng CBCP sa mahigit 100 milyong Pilipino na mahalagang mag – alay ng misa at panalangin para sa yumao nating mahal sa buhay.
