15,371 total views
Inanunsiyo ng Inter-Religious Leaders Council for National Transformation (IRLCNT) ang nakatakdang pagsasagawa ng malaking kilos-protesta laban sa korapsyon at political dynasty sa bansa sa June 28, 2026.
Tinaguriang ang nakatakdang pagkilos na “White Ribbon March” na gaganapin sa EDSA People Power Monument at bilang pagpapatuloy sa panawagan ng mga nakalipas na Trillion Peso March na nagsimula noong Setyembre 21 ng nakalipas na taong 2026.
Pangungunahan ang White Ribbon March ng Inter-Religious Leaders Council for National Transformation (IRLCNT) at White Ribbon Movement (WRM) na isang open coalition na mag aabot sa 50 mga organisasyon na pinagsamang grupo na kapwa nagnanais na mawakasan na ang mga kaguluhan, kawalang katarungan, at katiwaliang nagaganap sa lipunan.
Samantala muli ring binigyang diin ni Kidapawan Bishop Jose Colin Bagaforo – Chairman ng CBCP-Episcopal Commission on Interreligious Dialogue at convenor ng Inter-Religious Leaders Council for National Transformation (IRLCNT) at White Ribbon Movement (WRM) ang panawagan na litisin at papanagutin ang lahat ng sangkot at mga mapapatunayang kabilang sa nagwaldas sa kaban ng bayan.
Muli ring nanawagan ang Obispo na suportahan ang isang tunay na Anti-Political Dynasty Law na ganap na tatapos sa pamamayani ng mga pamilyang dinastiya sa pulitika sa bansa.
Iginiit din ni Bishop Bagaforo ang panawagan ng koalisyon sa pagpapatupad ng reporma sa halalan na magpapatibay sa kredibilidad ng resulta ng halalan sa bansa.
