5,961 total views
Mamamahayag, kinilala ng Obispo
Kinilala ni Antipolo Bishop Ruperto Santos ang lahat ng mga naglilingkod sa larangan ng pamamahayag lalo na ang mga nasa media ministry ng simbahang katolika.
Sa pagdiriwang ng World Communications Day pinuri ng obispo ang masigasig na paglilingkod ng mga journalists, broadcasters, digital content creators, social media managers, Church communication officers, at iba pang may kahalintulad na gawain.
Batid ni Bishop Santos ang malaking tungkuling ginagampanan ng mga mamamahayag at mga nasa media ministry upang ipahayag ang katotohanan sa lipunan lalo na sa kasalukuyang panahon na laganap ang fake news.
“Your role, considered a ministry, carries exceptional weight in these times. You are more than mere transmitters of information; you are bridges of understanding, bearers of hope, and cultivators of communion in a world often broken by misunderstanding and division,” bahagi ng pahayag ni Bishop Santos.
Aminado rin ang opisyal na nahaharap sa matinding hamon ang sektor ng pamamahayag tulad ng pressure sa mga instant news lalo sa social media, ang masalimuot na samu’t saring media platforms at ang pananagutang pagnilayan ang katotohanan sa mga impormasyong nararapat ibahagi sa publiko.
Paalala ni Bishop Santos sa mga manggagawa sa media kabilang na ang mga media ministers sa mga simbahan na sagrado ang kanilang gawain at maituturing na pakikiisa sa misyon ni Hesus na palaganapin ang katotohanan sa pamayanan. “In the Church, your work extends the reach of the Gospel beyond our sanctuary walls, bringing Christ’s message of love and redemption to screens and devices worldwide. In the secular world, your commitment to truth and ethical reporting helps build a more informed and just society,” dagdag pa ni Bishop Santos.
Dalangin ni Bishop Santos sa Panginoon ang kaliwanagan ng isip at karunungan ng mga media personel upang patuloy na manindigan sa pagbabahagi ng katotohanan, labanan ang anumang uri ng sensationalism, at maging daan sa pagsusulong ng higit na pang-unawa sa mamamayan.
“I pray that this day renews your sense of purpose and mission. May you find joy in your calling to be communicators of truth, and may the Holy Spirit continue to inspire your creative endeavors in service of human dignity and divine truth,” ani Bishop Santos.
Ngayong taon ipagdiriwang ang 59th World Communications Day sa temang ‘Share with gentleness the hope that is in your hearts’.
Ipinagdiriwang ng simbahan ang World Communications Day isang linggo bago ang Pentekostes na itinatag ni St. Paul VI noong 1967 bilang paraan ng paghimok na sama-samang pagnilayan ang oportunidad at mga hamong kakaharapin sa pag-usbong ng mga makabagong paraan ng social communications.
