131 total views
Nakiisa si Daet Bishop Herman Abcede kay Bayombong Bishop Jose Elmer Mangalinao at sa mga komunidad na nagsusulong ng pangangalaga sa kalikasan sa gitna ng mga hamong kanilang kinakaharap.
Tiniyak ni Bishop Abcede ang panalangin ng Diyosesis ng Daet para sa Diyosesis ng Bayombong, kay Bishop Mangalinao, at sa lahat ng patuloy na nagtataguyod ng pangangalaga sa sangnilikha.
Binigyang-diin ng obispo na ang pagtataguyod sa kalikasan ay hindi lamang usaping pangkapaligiran kundi isang mahalagang pananagutang moral at espirituwal na ipinagkatiwala ng Diyos sa sangkatauhan.
“The Diocese of Daet joins them in affirming that care for creation is not merely an environmental concern but a moral and spiritual responsibility entrusted to us by God,” pahayag ni Bishop Abcede.
Ayon pa kay Bishop Abcede, mahalagang magsilbing inspirasyon sa susunod na henerasyon ang sama-samang pagkilos upang mapangalagaan at mapanatili ang sangnilikha.
“May our shared commitment to protect the earth inspire future generations to cherish and preserve the gift of creation,” aniya.
Ang mensahe ni Bishop Abcede ay kasunod ng lumalawak na suporta ng iba’t ibang lider ng Simbahang Katolika para kay Bishop Mangalinao na nahaharap sa mga kasong may kaugnayan sa kanyang pagsusulong ng pangangalaga sa kalikasan at pagtatanggol sa mga komunidad na apektado ng pagmimina sa Nueva Vizcaya.
Bukod kay Bishop Mangalinao, kabilang din sa mga kinasuhan sina Fr. Christian Dumangeng, dating Social Action Director ng diyosesis at kasalukuyang station manager ng Radio Veritas Bayombong; Florentino “Tinong” Daynos, isang lider ng grupong kontra pagmimina; at anim pang indibidwal na sangkot sa pagpapanatili ng isang barikada sa loob ng Bugkalot/Ilongot ancestral domain.
Hindi naman pinagbigyan ng Kasibu Municipal Trial Court ang kahilingan para sa Temporary Restraining Order (TRO), habang nakatakda ang pagdinig sa kahilingan para sa writ of preliminary injunction sa Hunyo 23.
