13,318 total reads
Pormal nang isinumite ng Pilipinas sa United Nations ang opisyal na nautical chart ng Bajo de Masinloc at mga nakapaligid nitong katubigan.
Ayon sa Department of Foreign Affairs o DFA, isinagawa ang pagsusumite ni Philippine Permanent Representative to the United Nations Enrique Manalo alinsunod sa Article 16 ng United Nations Convention on the Law of the Sea o UNCLOS.
Batay sa DFA, layunin ng pagsusumite na maidokumento ang opisyal na maritime entitlements ng Pilipinas at mapanatili ang mga ito bilang bahagi ng opisyal na talaan ng United Nations.
Sinabi rin ng ahensya na mahalaga ang hakbang sa pagpreserba ng mga maritime claim ng bansa, kabilang ang posibleng epekto ng climate change at pagtaas ng antas ng dagat.
Ayon naman kay Palace Press Officer Claire Castro, bahagi ito ng patuloy na hakbang ng pamahalaan kaugnay ng West Philippine Sea at sa pagsusulong ng mga karapatan ng Pilipinas sa ilalim ng UNCLOS at ng 2016 Arbitral Award.
“Mahalaga rin ito sa pagpreserba ng opisyal na record ng mga maritime entitlement ng bansa sa harap ng epekto ng climate change sa pagtaas ng lebel ng dagat,” ayon kay Castro.
Matatandaang ilang ulit nang iginiit ng administrasyong Marcos na ipagpapatuloy ng Pilipinas ang pagtatanggol sa mga karapatan nito sa West Philippine Sea sa pamamagitan ng mapayapa at legal na pamamaraan.
“Isa lang ang hakbang na ito ng pamahalaan na naglalayong mapanatili sa kaisipan ng bawat Pilipino at ng buong mundo ang mga karagatan ng Pilipinas lalong lalo na ang West Philippine Sea,” dagdag pa ni Castro.
