21,134 total reads
Ito ang hamon ni Antipolo Bishop Ruperto Santos sa mga mananampalataya bilang pakikiisa sa pandaigdigang pagdiriwang ng Season of Creation ngayong taon.
Binigyang-diin ni Bishop Santos ang temang “Peace with Creation” o Kapayapaan kasama ang Sangnilikha, kung saan hinihikayat ng Kanyang Kabanalan Papa Leon XIV ang lahat na pagnilayan ang wastong ugnayan at tungkuling iniatas ng Diyos sa tao bilang mga katiwala ng kalikasan.
Dagdag pa ng obispo, hindi dapat ituring ng tao ang kalikasan bilang pag-aari na maaaring abusuhin, kundi isang kaloob ng Diyos na dapat igalang at pangalagaan.
“It is a call to live in harmony with the world God has entrusted to our care. And it is a reminder that peace is not just the absence of conflict—it is the presence of justice, of balance, of love,” pahayag ni Bishop Santos sa kanyang pastoral statement.
Gayunman, iginiit din ni Bishop Santos na sugatan na ang mundo dahil sa mga mapaminsalang gawain ng tao na nagdudulot ng polusyon, pagkaubos ng kagubatan, climate change, at labis na paggamit ng likas na yaman—na higit na nagpapahirap sa mga maralita.
Bilang tugon, iminungkahi ng obispo ang three Rs bilang gabay tungo sa paggaling, katarungan, at pagpapakita ng pag-ibig para sa inang kalikasan.
Kabilang dito ang respect o paggalang bilang pagkilala sa kabanalan ng lahat ng nilalang ng Diyos; restore o pagsasaayos na hinihikayat ang pagtulong sa paghilom ng sugatang mundo sa pamamagitan ng pagtatanim, paglilinis, at pagbawas ng pinsala; at respond o pagtugon bilang pagkilos laban sa pagkasira ng kalikasan tulad ng pagbawas ng basura, pagtitipid ng enerhiya, at pagsusulong ng katarungan para sa kapaligiran.
Panawagan ni Bishop Santos sa lahat na maging tunay na tagapaghatid ng kapayapaan—hindi lamang sa tahanan at lipunan, kundi pati sa pakikitungo sa kalikasan.
“Season of Creation is not just a calendar event—it is a spiritual invitation… May our lives reflect the peace that Christ offers—a peace that flows through creation, through justice, and through love,” ayon kay Bishop Santos.
Itinatag ng yumaong Papa Francisco ang World Day of Prayer for the Care of Creation noong 2015, na hudyat ng pagsisimula ng Season of Creation na ipinagdiriwang mula unang araw ng Setyembre hanggang ikaapat ng Oktubre, kapistahan ni San Franciso ng Assisi–ang patron ng kalikasan.
