51,362 total reads
Inaanyayahan ng pamunuan ng Nuestra Señora de los Angeles Parish sa Pilapila, Binangonan Rizal ang mga mananampalataya para sa maringal na pagdiriwang ng pontifical coronation sa patrona ng lugar.
Ayon sa dambana maituturing itong makasaysayan at natatanging sandali ng pananampalataya ang pagpuputong ng korona sa Mahal na Birheng Nuestra Señora de los Angeles – Our Lady of the Lake, La Reina y Madre de Binangonan, na gaganapin sa January 17, 2026.
Sinabi ng pamunuan ng parokya na ang coronacion pontificia ay pagkilalang iginagawad ng Simbahan sa malalim at matibay na debosyon ng sambayanan sa Mahal na Birhen, na sa mahabang panahon ay nagsilbing bukal ng pag-asa, gabay, at pagkakaisa ng kristiyanong pamayanan ng Binangonan.
Isasagawa ang banal na pagdiriwang ganap na alas singko ng hapon na pangungunahan ni Papal Nuncio to the Philippines Archbishop Charles Brown katuwang si Antipolo Bishop Ruperto Santos kung saan inaasahan ang pagdalo ng mga deboto mula sa iba’t ibang panig ng lalawigan at karatig-diyosesis upang makiisa sa makasaysayang pagdiriwang.
Binigyang-diin ng mga tagapangasiwa ng parokya na ang Coronacion Pontificia ay hindi lamang seremonyal na gawain kundi isang panawagan sa mas malalim na pananampalataya at patuloy na pagtugon sa hamon ng pagiging tunay na saksi ni Kristo sa pamamagitan ng mga halimbawa ng Mahal na Ina.
Sa ilalim ng titulong La Reina y Madre de Binangonan, patuloy na kinikilala ng mga mananampalataya ang Mahal na Birhen bilang mapagkalingang Ina at Reynang namamagitan para sa bayan, nagbubuklod sa mga pamilya, at umaakay sa sambayanan sa landas ng pananampalataya at paglilingkod.
Hinikayat ang lahat ng deboto na makiisa sa pagdiriwang bilang tanda ng pasasalamat sa mga biyayang tinanggap at bilang panibagong panata ng pagtitiwala sa mapag-arugang pagkalinga ng Ina ng mga Anghel.
Matatandaang sa kapistahan ng patrona noong October 2, 2025 ibinahagi ni Bishop Santos ang paggawad ni Pope Leo XIV sa pontifical coronation sa imahe.
Binigyang-diin ng obispo na ang pagkilala ng Simbahang Katolika sa imahe ng Mahal na Ina ay magsisilbing gabay sa mga mamamayan, lalo na sa mga naninirahan malapit sa lawa ng Laguna de Bay.
Batay sa tala, nagsimula ang debosyon sa Our Lady of the Angels noong 1892 nang masaksihan ni Teniente Ambrosio Blanco ang isang liwanag at estampa ng Mahal na Birheng Maria.
Mula sa larawan sa estampa ay nilikha ang imahen ni Juan de Plamenco ng Malate, Manila, na inilipat sa isang kapilya sa Pila Pila. Noong 2022, ginawaran ito ng Episcopal Coronation bilang pagkilala sa 130 taon ng debosyon.
