27,573 total views
Inaasahang magtitipon ang daan-daang deboto ng Poong Jesus Nazareno sa Davao City sa pagdiriwang ng ika-11 Fiesta ng Nuestro Padre Jesus Nazareno ngayong January 9, kasabay ng isasagawang maringal na Traslacion Procession at mga banal na misa.
Ayon sa pahayag ng Poong Jesus Nazareno – Davao, magsisimula ang traslacion alas-8 ng umaga mula sa San Alfonso Maria de Liguori Parish sa Mandug patungo sa Our Lady of Peñafrancia GKK Chapel sa DECA Homes Esperanza Tigatto, Buhangin, kung saan nakadambana ang opisyal na replika ng Mahal na Poong Jesus Nazareno.
Pagkatapos ng prusisyon ay susundan ito ng Fiesta Mass alas-10 ng umaga na pangungunahan ni Davao Archbishop Romulo Valles habang mayroong karagdagang misa alas-6 ng gabi para sa mga debotong hindi makadadalo sa umagang pagdiriwang.
Hinikayat ng pamunuan ng kapilya at parokya ang mga mananampalataya na magdala ng kani-kanilang mga imahen ng Jesus Nazareno na babasbasan ng mga pari matapos ang mga misa, bilang pagpapahayag ng pananampalataya at panata.
Ang Our Lady of Peñafrancia GKK Chapel ay nasa ilalim ng San Alfonso Maria de Liguori Parish, Mandug, at patuloy na nagsisilbing sentro ng debosyon sa Jesus Nazareno sa lungsod.
Tema ng pagdiriwang na NAZARENO 2026 ang “Dapat SIYANG itaas, at AKO nama’y BUMABA,” na hango sa Ebanghelyo ni San Juan 3:30.
Ngayong 2026 rin ang ikalawang taon na ipinagdiriwang ang Kapistahan ng Poong Jesus Nazareno sa buong bansa.
