3,879 total reads
Muling iginiit ng mambabatas ang pagpasa ng mga panukala na tutugon o makakapigil sa epekto ng patuloy na pagtaas ng presyo ng petrolyo.
Ayon kay Assistant Minority leader, Gabriela Party list Representative Arlene Brosas, walang kakayahan ang pamahalaan upang pigilan ang patuloy na pagtaas ng presyo ng petrolyo.
Sa ulat, nagpatupad ng pagtataas ng presyo ang mga kumpanya ng langis sa loob ng magkakasunod na anim na linggo na ang pinakahuli ay ngayong araw na nagkakahalaga ng piso at 50 sentimo sa kada litro ng diesel; at dalawampiso at 50 sentimo sa gasoline.
Ayon kay Brosas, tatlong panukala ang kanilang inihain sa kamara kabilang na ang pagsasantabi sa Downstream Oil Industry Deregulation Law of 1998 na siyang ginagamit na dahilan ng mga kompanya ng langis ang pagpapatupad ng lingguhang pagtaas sa presyo.
Kabilang din sa ipinanukala ng Makabayan bloc ang nationalizing Petron Corporation- o pagbili o muling pagbawi ng pamahalaan sa Petron upang makatulong na makontrol ang pagtaas ng presyo ng petrolyo-dulot ng paggalaw ng presyo sa pandaigdigang merkado at ang bill instituting centralized procurement of oil products.
“Hindi na pwedeng idahilan pa ang galaw sa presyuhan ng langis sa international market, kasi kung ganun, sinasabi rin natin na okay lang pumalo ng P80 kada litro ang diesel. What should be done is to consider pending proposals to regulate the downstream oil industry, including centralized procurement of oil products,” ayon kay Brosas.
Iginiit ng mambabatas na hindi dapat magpatali ang pamahalaan sa umiiral na pandaigdigang kartel sa pamamagitan ng pagbabawas ng suplay na dahilan sa pagtaas ng presyo ng mga produkto.
Sa kasalukuyan ay nagsasagawa naman ng kilos protesta ang Bayan Muna at PISTON bilang pagkondena sa patuloy na pagtaas ng produktong petrolyo gayundin ang panawagan ng suspensyon sa pagpapataw ng Value added Tax at excise tax sa petroleum products.
