21,181 total reads
Dalawang talinghaga ang pagbasa sa ebanghelyo: ang mangingisda at ang maybahay.
Parehong may kinalaman sa pagpili. Pagpili ng mangingisda sa mga nahuli ng kanyang lambat. Hindi lahat ay iuuwi niya. Ang iba ay ibabalik sa dagat.
Ganyan din daw sa mahusay na maybahay. Mula daw sa imbakan niya ng mga bagay-bagay sa bodega, may bago at may luma. Hindi naman lahat ng bagay na bago ay mahalaga at dapat sinupin. At may mga bagay na kung kailan naluluma lalong nagiging mahalaga.
May pamantayan sa pagpili ng iuuwi ng mangingisda. May pamantayan din sa pagpili ng maybahay sa mga dapat manatili sa kanyang bodega. Ang pamantayan ay silbi o halaga.
Ganyan din daw sa kaharian ng Diyos. Isang prinsipyong walang pinagkaiba sa ugali ng mga taong may layunin sa buhay. Namimili rin ng dapat pagkaabalahan o pagtuunan ng pansin. Ang pamantayan ay pareho din: mahalaga ba ito? Makahulugan ba ito? May maitutulong ba ito sa aking pagtupad sa aking layunin sa buhay?
Nagiging makalat ang buhay na walang layunin. Walang pamantayan na kahalagahan o kahulugan sa pagpili ng mga bagay-bagay na dapat isaisip o isapuso, mga dapat tandaan o kalimutan, mga dapat paglaanan ng oras o bigyang pansin, mga bagay na dapat isagawa at hindi.
Ganyan din ang punto ng kuwento ni Propeta Jeremias tungkol sa tagamolde ng palayok. Pumipili din daw siya ng disenyong ibig niyang gawin sa luwad. Naalala ko ang kuwento tungkol sa isang batang namangha sa inukit na disenyo ng lolo niya ng isang leon sa isang pirasong kahoy. “Lolo paano nyo nalaman na may leon sa loob ng kahot?” Sagot ng lolo, “Bago ko ito nakita sa loob ng kahoy, nakita ko muna sa loob ko.”
Sa panalanging itinuro sa atin ng Panginoon, magkasunod ang linyang “mapasaamin ang kahaarian mo” at “sundin ang loob mo.” Hindi sasaatin ang kaharian ng Diyos kung hindi natin aalamin o kikilakanin ang kalooban ng Diyos. Paano siya namimili, paano siya nagsasaayos? Ano ang layunin niya? Ano ang mahalaga at makahulugan para sa kanya?
Kung ibig mo daw mapasunod ang tao sa maayos at malinis na kapaligiran, huwag mong isuko ang pagsasaayos at paglilinis. Unahan mo sa paglilinis ang mga mahilig na magkalat. Ipakita at iparamdam ang malasakit. Pag sinabing, “Ay ang linis! Maayos!” May nagmamalasakit. Huwag tayong magkakalat. Nakakahawa ang malasakit para kalinisan at kaayusan. Ang pag-uugali, kapag mula sa pansarili ito ay napagkakaisahan, ito ay nagiging kultura. Gagawin kahit hindi ipag-utos.
