426 total views
Bagamat, inaasahang magiging maigsi ang unang SONA o State of the Nation Address ni Pangulong Rodrigo Duterte,umaasa naman itong magiging malaman at maghihintay ang Alyansa Tigil Mina ng pahayag ng pangulo kaugnay sa mga suliraning pangkalikasan.
Ayon kay Jaybee Garganera, National Coordinator ng Grupo, malaki ang pag-asa nilang pagtutuunan ng pansin ni President Duterte ang kalikasan, at hindi ito magiging katulad ng nagdaang administrasyon.
“Inaasahan namin na kahit maiksi ay mababanggit ni President Duterte yung mga issue tungkol sa environment o sa mga hinaharap nating hamon sa kalikasan. Kasi kung matatandaan natin, nitong anim na taon ni PNoy, dun sa anim na SONAng ibinigay nya, isang beses lang nabanggit yung environment kasama na yung usapin ng mining at yung natitira nating gubat,” pahayag ni Garganera sa Radyo Veritas.
Samantala, aabangan rin ng ATM ang muling pagbibigay pansin ng pangulo sa mining industry ng Pilipinas, tulad ng ipinangako nito noong panahon ng kampanya.
“So ngayon inaasahan na natin na sa unang SONA ni President Duterte, mababanggit nya ang tungkol sa mining at saka recently yung tungkol sa climate change, bukod dun inaasahan natin na uulitin nya or at least mabanggit nya muli yung kanyang paninindigan na hindi nya papayagan yung iresponsableng pagmimina,” dagdag pa ni Garganera.
Sa kasalukuyan, habang patuloy ang mining audit na isinasagawa sa 40 operating metallic mines at 65 non-metallic mines sa bansa, ay una nang nag suspinde ang Department of Environment and Natural Resources ng apat na minahan.
Ito ang Benguet Corp. Nickel Mines Inc., Zambales Diversified Metals Corp., LNL Archipelago Minerals Inc. at Eramen Minerals Inc.
Sa Laudato Si ng Santo Papa Francisco, kinokondena nito ang labis na pagmimina ng mga kumpanyang mula sa First World Countries sa mga mahihirap na bansa tulad ng Pilipinas.
