5,114 total views
Tiniyak ng Manila Archdiocesan Ministry for Labor Concern (RCAM-AMLC) ang patuloy na pagtulong sa mga manggagawa sa pamamagitan ng ibat-ibang programa at pamamaraan.
Ito ang mensahe ni Father Erik Adoviso – Minister ng RCAM-AMLC sa pagdiriwang ngayong araw ng labor day upang higit na mailapit ang simbahan at matulungan ang mga manggagawa.
Ayon sa Pari, nagpapatuloy ngayong ang Paralegal ng simbahan o PASIMBA kung saan nagdaraos ng mga seminars at programang itinuturo sa mga manggagawa ang kanilang mga karapatan at batas na maaring magamit upang maiwasan ang pagmamalabis at malaman ang kanilang mga karapatan.
Gayundin ang paglalapit ng RCAM-AMLC sa mga manggagawa sa mga oportunidad na magkaroon ng trabaho o bagong kabuhayan na matapos mawalan o matanggal sa kanilang trabaho ang mga manggagawa.
“Ganun pa rin naman ang issue ng mga manggagawa: ang pwedeng swelduhin ng isang pangkaraniwang manggagawa. Yun lang naman ang panawagan ng mga manggagawa sa atin, lalong-lalo na yung mga manggagawang nasa laylayan ng lipunan. Sana matapos na rin ang contractualization at gawing regular ang mga contract workers natin. Karapatan ng bawat manggagawa ang disenteng sahod at seguridad sa trabaho,” ayon sa panayam ng Radyo Veritas kay Father Adoviso.
Sa pagdiriwang ng Labor Day ay tiniyak din ni ni Father Adoviso ang pananatili ng pakikibaka kung saan sinasamahan ng simbahan ang mga manggagawa sa pag-apela nang mas maayos na buhay sa pamahalaan.
Ilan sa mga ito ay ang pagsama sa mga manggagawa sa patuloy na panawagan na isulong ang nakakabuhay na suweldo na ayon sa mga pag-aaral ng Ibon Foundation, ngayon ay umaabot na sa hanggang 1,200 ang living minimum wage kada araw upang masuportahan ng mga manggagawa ang kanilang mga pamilya.
“Wala nang kakayahang bumili ang mga pangkaraniwang Pilipino dahil sa patuloy na pagtaas ng presyo ng mga bilihin. Kaya nananawagan tayo na magkaroon ng kontrol ang gobyerno sa presyo ng langis at mga pangunahing bilihin. Sana ay mapag-aralan na rin kung paano wawakasan o maire-repeal ang Oil Deregulation Law. Ito ang mga hamon na patuloy na kinakaharap ng mga manggagawa ngayon,” ayon pa sa panayam ng Radyo Veritas kay Fr.Adoviso.
Gayundin ang patuloy na pagsama ng simbahan at nang RCAM-AMLC sa mga manggagawa upang umapela ng pantay na mga benepisyo at malayang pagkilos katulad ng pagbuo ng union upang mapalakas ang collective bargaining agreement sa pagitan ng mga manggagawa at kanilang mga employers.
