11,251 total reads
Kaisa ng sambayanang Pilipino, binati ni Pangulong Ferdinand Marcos Jr. si Filipina tennis star Alex Eala matapos itong magtala ng kasaysayan bilang kauna-unahang Pilipinong kampeon sa Women’s Tennis Association o WTA 500 singles tournament.
Ayon sa Pangulo, muling nagbigay ng karangalan sa bansa si Eala at pinatunayan na kayang makipagsabayan ng mga atletang Pilipino sa pinakamataas na antas ng pandaigdigang kompetisyon.
“Congratulations on yet another historic achievement. You continue to redefine what is possible for Philippine tennis and inspire countless young Filipinos to dream without limits,” ayon sa mensahe ni Pangulong Marcos.
Binigyang-diin din ni Marcos na nagsisilbing inspirasyon si Eala sa kabataang Pilipino upang mangarap nang malaki at magsikap na maabot ang kanilang mga layunin.
Kasabay nito, tiniyak ng Pangulo ang patuloy na suporta ng sambayanang Pilipino kay Eala sa mga susunod pa nitong laban sa international circuit.
Sa kanyang kampanya patungo sa tagumpay sa Washington D.C., tinalo ni Eala ang ilang nangungunang manlalaro sa mundo, kabilang ang reigning Olympic champion na si Zheng Qinwen, defending champion na si Leylah Fernandez, world No. 10 na si Elina Svitolina, four-time Grand Slam champion Naomi Osaka, at world No. 3 na si Jessica Pegula.
Ang tagumpay ni Eala ang kauna-unahang WTA 500 singles title na naipanalo ng isang Pilipino sa kasaysayan ng propesyonal na tennis.
Una na ring hinikayat ni Cebu Archbishop Alberto Uy ang mga kabataang Pilipino na higit na pahalagahan ang mabuting pagkatao kaysa sa kasikatan at tagumpay, kasabay ng pagkilala sa Filipina tennis star na si Eala bilang huwaran ng kababaang-loob, sipag, tiyaga at pananampalataya.
Ayon sa arsobispo, mahalagang magkaroon ng mga huwarang hindi lamang kilala sa kanilang tagumpay kundi nagpapakita rin ng integridad, kabutihan at malasakit sa kapwa.
