517 total reads
Makikiisa si Pope Leo XIV sa daan-daang batang mananalangin ng Santo Rosaryo para sa kapayapaan sa mundo sa Vatican sa Oktubre 1.
Tinatayang 700 hanggang 1,000 bata mula sa mga paaralan at parokya sa Rome ang magtitipon sa Vatican Gardens para simulan ang taunang “One Million Children Praying the Rosary” na isinusulong ng Aid to the Church in Need o ACN.
Sa alas-5 ng hapon, sabay-sabay na mananalangin ang mga bata at ang Santo Papa sa Lourdes Grotto sa Vatican, kasama ang mga bata, pamilya at komunidad ng mga Kristiyano sa iba’t ibang panig ng mundo.
Sa unang pagkakataon, tatagal nang isang buong linggo ang pandaigdigang pananalangin simula October 1 hanggang 7. Hinihikayat ang mga paaralan, pamilya at parokya na pumili ng araw para makiisa sa pagdarasan.
Kabilang sa mga makikibahaging mga komunidad sa Sudan, Zimbabwe, Mozambique, Sierra Leone at Bolivia, gayundin ang mga lugar na nakararanas ng digmaan, kahirapan at kaguluhan.
Magtatapos ang kampanya sa Kapistahan ng Our Lady of the Rosary sa Oktubre 7.
Sinimulan ang pandaigdigang inisyatiba ng pananalangin sa Venezuela noong 2005 at mula noon ay naging malawak na panalangin ng mga bata, pamilya, paaralan at parokya sa iba’t ibang bansa.
Layunin nitong pag-isahin ang mga mananampalataya sa panalangin para sa kapayapaan, pagkakaisa at pag-asa sa gitna ng karahasan, pag-uusig at iba pang krisis sa mundo.
