42,050 total reads
Tinututukan ng House prosecution ang mga sariling SALN o Statement of Assets, Liabilities and Net Worth ni Vice President Sara Duterte upang patunayan ang hindi pagkakatugma sa kanyang cash declarations at ang patuloy na paghawak sa mga business interests habang nagsisilbing bise presidente.
Sa ika-25 araw ng impeachment hearing sa Senado, iniharap ng prosekusyon ang 10 layunin sa testimonya ni Atty. Karen Batu ng Official Records Division ng Office of the Ombudsman na siyang may hawak ng mga SALN.
Kabilang sa mga dokumentong nais ipakita ng prosekusyon ang mga SALN ni Duterte at ng kanyang asawang si Atty. Manases Carpio mula 2007 hanggang 2025.
Ayon sa prosekusyon, tumaas ang kanilang idineklarang net worth mula ₱7.25 milyon noong 2007, naging ₱65.3 milyon noong 2021, at umabot sa ₱98.6 milyon noong 2025.
Sinuri rin ng prosekusyon ang mga SALN ni Duterte mula 2019 hanggang 2025 kung saan, ayon sa pagsusuri, walang idineklarang cash on hand o cash in bank, matapos siyang magdeklara ng cash sa mga naunang SALN.
Tinitingnan din ng prosekusyon ang sinasabing kawalan ng deklarasyon ng foreign currency deposits, kabilang ang US dollars, Chinese RMB at iba pang foreign currencies.
Bukod dito, sinuri rin ang mga business at financial interests na nakalista sa kanyang mga SALN, kabilang ang mga interes sa Metro City Chow Foods Corporation at GenCorp Industries Inc.
Iginiit ng prosekusyon na maaaring patunayan ng mga dokumento na nagpatuloy si Duterte sa paghawak ng business at financial interests matapos siyang maging bise presidente, sa halip na i-divest ang mga ito.
