15,360 total reads
Hinimok ni Rev. Fr. Angelito Cortez, OFM, Co-Executive Secretary ng Conference of Major Superiors in the Philippines (CMSP) ang Simbahan sa Pilipinas na patuloy na alalahanin ang panahon ng Batas Militar bilang paalala sa kahalagahan ng pagkakaisa at paninindigan laban sa kawalang-katarungan at pang-aapi.
Ayon kay Fr. Cortez, mahalagang balikan ang panahong nagbuklod ang Simbahan upang manindigan sa harap ng mga paglabag sa karapatang pantao, lalo na sa panahong maraming Pilipino ang namatay, nawala, dumanas ng torture at hanggang ngayon ay hinihintay pa rin ng kanilang mga pamilya ang katarungan.
“Actually, magandang pagnilayan natin bilang isang simbahan sa Pilipinas kung bakit patuloy na inaalala ang panahon ng batas militar. Una, dahil panahong ‘yon, talagang nagbuklod ang simbahan upang manindigan.” Bahagi ng pahayag ni Fr. Cortez sa Radyo Veritas.
Mahalaga rin aniya ang paggunita upang labanan ang maling impormasyon at mapanatili ang katotohanan tungkol sa kasaysayan.
“Nag-aalala tayo dahil ayaw natin ng baluktot na impormasyon. Nag-aalala tayo para itama ‘yung kasaysayan.” Dagdag pa ni Fr. Cortez.
Para kay Fr. Cortez, dapat maging daan ang pag-alala upang muling magkaisa ang mga Pilipino, higit sa anumang kulay pulitikal o partidong sinusuportahan.
“Tingin ko ang pinakamagandang diwa ng Martial Law noon ay ‘yung paigtingin ‘yung pagka-Pilipino natin. Na wala tayong kulay: walang pula, walang berde, walang partidong politikal, o wala tayong sinusunod na mga politiko, kundi tayo ay Pilipino.” Ayon pa kay Fr. Cortez.
Aniya, mahalagang buhayin ngayon ang ganitong diwa ng pagkakaisa upang harapin ang mga suliranin ng bansa, kabilang ang korapsyon at iba pang usaping nangangailangan ng pananagutan.
Kabilang sa partikular na tinukoy ng Pari ang impeachment proceedings laban kay Vice President Sara Duterte, ang kaso ng dating Pangulong Rodrigo Duterte sa International Criminal Court, at mga kontrobersiya sa flood-control projects bilang mga isyung dapat harapin ng lipunan ng may paninindigan at pananagutan.
“Huwag natin isipin kung sino ‘yung sinusundan nating politiko o kulay, kundi ‘yung pagka-Pilipino natin na kailangan nating yakapin at muling ipadama na nandito tayo para sa bawat isa.” Ani Fr. Cortez.
Kaugnay nito, kinilala ni Fr. Cortez ang naging papel ng Radyo Veritas sa paghikayat sa mga layko, ordinaryong mamamayan at kabataan na gamitin ang kanilang tinig sa harap ng mahahalagang usapin ng bayan.
“Ang Radio Verita ang naging plataporma para hikayatin ang mga layko, ang mga karaniwang tao, at higit sa lahat ang mga kabataan.” Dagdag pa ni Fr. Cortez.
Hinimok din ng Pari ang mga kapanalig na huwag matakot at gamitin ang kanilang boses at karapatan upang makibahagi sa pagtataguyod ng kabutihang panlahat.
“Huwag tayong mapagod, huwag tayong matakot. Gamitin natin ‘yung ating boses, gamitin natin ‘yung ating karapatan para himukin ang lipunan na may pag-asa pa ang Pilipinas kung tayo ay magkakaisa.” Panawagan ni Fr. Cortez.
Binigyang-diin ni Fr. Cortez na ang pananagutan ng mga Kristiyano sa bayan ay hindi nagtatapos sa pagdarasal at pagsisimba kundi dapat makita rin sa aktibong pakikilahok para sa kinabukasan ng bansa.
“Sama-sama po tayo, hindi lang sa pagdarasal, hindi lang sa pagsisimba, kundi panindigan natin na meron tayong responsibilidad para sa kinabukasan ng ating bayan.” Ayon pa kay Fr. Cortez.
Sa paggunita sa ika-54 na anibersaryo ng deklarasyon ng Martial Law, muling ipinapaalala ng Simbahan na ang pag-alala sa kasaysayan ay dapat humantong sa katotohanan, pagkakaisa, pagtatanggol sa dignidad ng tao at paninindigan para sa katarungan at kapayapaan.
