21,225 total views
Nagpaabot ng pasasalamat si Tagbilaran Bishop Alberto Uy sa lahat ng PPCRV volunteers ng diyosesis na masigasig na naglingkod at nagbantay sa katatapos lamang na 2025 Midterm National and Local Elections.
Ayon sa Obispo, kahanga-hanga ang kahandaang maglingkod, at pagmamahal sa bayan ng mga PPCRV volunteer na handang mag-alay ng kanilang panahon at lakas upang matiyak ang katapatan, kaayusan at kapayapaan ng halalan.
Paliwanag ni Bishop Uy, mahalaga ang tungkuling ginagampanan ng mga PPCRCV volunteers upang patuloy na matiyak ang pag-iral ng demokrasya ng bansa sa pamamagitan ng pagbabantay sa kabuuang proseso ng halalan.
”DAGHANG SALAMAT, PPCRV VOLUNTEERS! Your commitment and love for honest, orderly, and peaceful elections truly shine. You came prepared, you gave your time, and until now, you’re still there — faithfully serving. We are deeply grateful for your selfless dedication to our democracy.” Bahagi ng mensahe ni Bishop Uy.
Una binigyang diin ni Bishop Uy na ang halalan ay hindi lamang isang simpleng gawaing pulitikal sa halip ay isang mahalagang pagkakataon para sa bawat mamamayan upang iprayoridad ang kapakanan at kinabukasan ng bayan na isang pagkakataon rin upang isulong ng bawat mamamayan ang isang lipunan kung saan namamayani ang katarungan, kapayapaan, katotohanan at pagmamalasakitan.
Batay sa tala ng COMELEC, mahigit 18,200 mga posisyon ang kinakailangan ihalal sa pambansa at pang-lokal na posisyon sa pamahalaan na kinabibilangan ng 12-senador, mga partylist representatives, congressional district representatives, governor, mayor, sangguniang bayan member at iba pa.
