512 total reads
Ginawaran ng pinakamataas na pagkilala ng Guild of Educators, Mentors and Student (GEMS) ang himpilan ng Radyo Veritas sa kapuri-puring pagpapamalas ng kahusayan, katapatan at dedikasyon sa larangan ng pagpapahayag at ng pagsasahimpapawid sa radyo.
Igagawad ang parangal na ‘Natatanging Hiyas ng Sining sa Radyo’ sa mga kinatawan ng Radio Veritas sa pagtitipon na nakatakda sa ika-2 ng Marso sa Center for Performing Arts, De La Salle Santiago Zobel School Ayala Alabang Village sa Muntinlupa City.
Ayon kay Ginoong Norman Llaguno, tagapagtatag at pangulo ng GEMS, nararapat na pahalagahan ang mahalagang ambag ng himpilan ng Radyo Veritas sa pagpapaangat ng antas ng propesyon sa larangan ng pagsasahimpapawid sa radyo na halos limang dekada nang nagsusulong at naninindigan sa katotohanan bilang boses ng Simbahang Katolika.
Ang GEMS ay isang samahan na binubuo ng mga akademisyan mula sa iba’t ibang paaralan, mga propesyunal galing sa mga pribadong institusyon at sektor ng lipunan kasama ang mga mag-aaral ng ilang mga prestihiyosong kolehiyo at pamantasan na naglalayong magbigay pagkilala at maggawad ng parangal sa mga mahuhusay na alagad ng sinig sa larangan ng Panulat, Tanghalan, Radyo, Telebisyon at Pelikula.
Sa susunod na taong 2019 ay nakatakda ang pagdiriwang ng ika-50 taon ng Radyo Veritas kung saan ilang mga aktibidad at programa ang inihahanda bilang pasasalamat sa mga patuloy na nagtitiwala at sumusuporta sa adbokasiya ng himpilan na ipalaganap ang mabuting balita ng Panginoon sa pamamagitan ng pagpapahayag ng katotohanan sa iba’t-ibang mga usaping panlipunan gayundin ang pagbibigay ng tunay na serbisyo sa mga nangangailangan.
