20,831 total reads
Kinilala ng Commission on Elections (COMELEC) ang Radyo Veritas 846 – Ang Radyo ng Simbahan bilang isa sa mga kaakibat ng komisyon sa matagumpay na pagsasagawa ng nakalipas na Pambansa at Lokal na Halalan noong May 12, 2025.
Sa naganap na Gabi ng Pasasalamat noong ika-18 ng Hulyo, 2025 ay kinilala ng COMELEC ang iba’t ibang mga grupo, organisasyon, institusyon at media agencies na tuwinang kaakibat ng komisyon sa pagsasagawa ng mapayapa, matapat, at marangal na halalan sa Pilipinas.
Ayon sa komisyon na pinangangasiwaan ni COMELEC Chairman George Erwin Garcia, mahalaga ang aktibong partisipasyon at pakikipagtulungan sa ahensya ng iba’t ibang mga instistusyon at grupo sa bansa upang matiyak ang patuloy na pag-iral ng demokrasya ng bansa.
“In recognition of the successful conduct of the 2025 National and Local Elections, the Commission on Elections takes great pride in hosting a Stakeholders’ Appreciation Night. This event serves not only to honor the collective dedication and cooperation demonstrated throughout the elections but also to reaffirm our steadfast commitment to democratic governance and to foster continued collaboration for credible, transparent, and inclusive elections in the future.” Bahagi ng mensahe ng COMELEC.
Bilang pasasalamat at pagkilala sa mahalagang papel na ginampanan ng Radyo Veritas 846 – Ang Radyo ng Simbahan bilang kaakibat ng Komisyon sa Halalan ay isang puno ang ipinangalan ng komisyon sa himpilan sa isinagawa nitong Tree Planting Activity na tinaguriang “Partners for Democracy (One Vote, One Tree)”.
“As a symbol of our gratitude and in honor of your contribution to the democratic process, a tree shall be planted under your agency’s name by the Commission.” Dagdag pa ng COMELEC.
Bilang kongkretong hakbang sa paggabay sa mga mamamayan upang maging mapanuri at matalinong botante sa halalan ay inilunsad ng Radyo Veritas 846 – Ang Radyo ng Simbahan ang ‘One Godly Vote’ education campaign noong 2021.
Bahagi ng nasabing voters education campaign ng media arm ng Archdiocese of Manila ang ‘Radio Veritas One Godly Vote Catholic E-Forum’ na layong ipakilala sa mga botante ang mga kandidato sa matataas na posisyon ng pamahalaan kabilang na ang pampanguluhan, pangalawang pangulo at senador.
Layunin ng One Godly Vote election campaign ng Radyo Veritas 846 na gabayan ang bawat botante sa maka-Diyos na pagpili ng mga bagong opisyal ng bayan na nangangahulugan sa pagsasantabi ng mga botante sa kanilang pansariling kapakanan at pagbibigay prayoridad sa tunay na ikauunlad at ikabubuti ng bayan lalo na ang common good o kabutihan ng mas nakararami.
