33,213 total views
Inaanyayahan nang Simbahang Katolika ang mga Pilipino na makiisa sa idadaos na ikalawang ‘Trillion Peso March’ sa Metro Manila at iba pang bahagi ng Luzon, Visayas at Mindanao.
Ayon kay Kalookan Bishop Pablo Virgilio Cardinal David, ito ay sa pangunguna ng Catholic Bishops’ Conference of the Philippines Episcopal Commission on Social Action, Justice and Peace na layuning ang pagkakakisa ng mga Pilipino laban sa katiwalian sa lipunan.
“Inuulit ko ang paanyaya na dumalo at makiisa sa Trillion Peso March Part 2, November 30, yan po ay kapistahan din ng apostol San Andres, at yun din ay araw ng kapanganakan ng isa pang Andres, Andres Bonifacio, ang magiting na bayani ng asawa’y taga-Kalookan si Oriang si Gregoria, kami po ay bayan ng magigiting na mga bayani, so sa November 30, pag-iisahin po natin ang isang pambansang pahayag na mapayapa makabayan at sama-sama na nananawagan para sa tapat na pamahalaan para sa wastong paggamit ng kaban ng bayan,” ayon sa mensahe ni Carinal David sa idinaos na ‘Festival of Voices for the 100th Year of the Christ the King’ sa National Shrine of Mary, Queen of Peace.
Gayundin ang paanyaya ni Clergy for Good Governance (CGG) Convenor Running Priest Father Robert Reyes sa mga Pilipino ano pa man ang kanilang relihiyon na makiisa sa pagtindig laban sa korapsyon.
Ito ay dahil kinakailangan ngayon ang tunay na pagbabago sa pamamagitan ng pinagsama-samang paninindigan ng mga Pilipino kung saan personal ang inaasahang pagdalo ng ibat-ibang Pilipino sa ikalawang Trillion Peso March.
“Kaya mga kababayan, ano man ang relihiyon nyo, katoliko, muslim, walang relihiyon, hindi naniniwala sa Diyos pero naniniwala sa isang bansang malaya, isang bansang maunlad at masagana, isang bansang hindi hati-hati at walang hidwaan, mahirap man ito, eto ang pangarap natin dahil ang Pilipinas ay magandang bansa, mayaman na bansa, madasalin na bansa, luntian ang bansa,” bahagi pa ng panayam ng Radyo Veritas kay Fr.Reyes.
Ang Trillion Peso March sa November 30 ay sa pangangasiwa ngayon ng Caritas Philippines katuwang ang mga religous groups at iba pang grupo na mula sa ibat-ibang sektor ng lipunan.
